Almaniya rəsmiləri ABŞ qoşunlarının çıxarılmasını simvolik addım kimi dəyərləndirsələr də, dərinləşən transatlantik parçalanma Avropanın iqtisadiyyatını və təhlükəsizliyini son dərəcə həssas vəziyyətə sala bilər...
Xüsusilə də Trampın avtomobil tarifləri, uzaqmənzilli raketlərin yerləşdirilməsi planından imtina və İran müharibəsinin fəsadları daha böyük narahatlıq doğurur…
Poliqon xəbər verir ki, The Wall Street Journal qəzetinin analitik hesabatına görə, Almaniya rəsmiləri prezident Donald Trampın ölkədən 5 min amerikan hərbi qulluqçusunu çıxarmaq qərarını simvolik addım kimi qiymətləndirsələr də, analitiklər dərinləşən transatlantik parçalanmanın Avropanın iqtisadiyyatını və təhlükəsizliyini son dərəcə həssas vəziyyətə sala biləcəyi barədə xəbərdarlıq edirlər.
Mütəxəssislər bildirirlər ki, Trampın avropa avtomobillərinə tətbiq etdiyi son tarif artımları, onun Almaniyada uzaqmənzilli raketlərin yerləşdirilməsi planından açıq şəkildə imtina etməsi, həmçinin İran müharibəsinin iqtisadi və hərbi nəticələri regiona daha ciddi təsir göstərəcək.
Daha böyük narahatlıq doğuran xəbər isə ABŞ-ın Almaniyada Tomahawk qanadlı raketləri və Dark Eagle hipersəs raketlərini idarə edəcək batalyonun yerləşdirilməməsi qərarıdır. Bu qərar 2024-cü ildə Bayden administrasiyası tərəfindən Ukraynada müharibə başladıqdan sonra Rusiyanın NATO-ya hücumunun qarşısını almaq məqsədilə qəbul edilmişdi.
Alman hərbi analitiki Niko Lanqenin sözlərinə görə, Berlin rəsmiləri Tramp administrasiyasının heç vaxt bu cür öhdəlik götürmədiyi üçün razılaşmanın şərtlərini yerinə yetirməyəcəyini gözləyirdilər. Lakin Lanqe vurğulayıb ki, Avropada bu qədər ciddi təhlükə səviyyəsi ilə üzləşdiyimiz bir vaxtda ənənəvi çəkindirmədəki bu boşluğun doldurulmaması əsl problemdir. Onun sözlərinə görə, Avropanın öz qoşunları var, lakin hələ ki, heç kim bu spesifik imkanlara malik deyil.
Digər narahatlıq doğuran məqam isə batalyonun göndərilməsindən imtinanın Tramp administrasiyası ilə Vladimir Putin arasında münasibətlərin yumşalmasına dair növbəti siqnal olmasıdır. Avropa liderləri hesab edirlər ki, bu addımlar Ukraynada sülh prosesinə nail olmaq səylərinə zərbə vurur.
Poliqon.info
