Lent az saytından verilən məlumata görə, ain.az xəbər verir.
Nar şirəsinin müntəzəm istifadəsi yüksək təzyiqdən əziyyət çəkən insanlarda həm sistolik, həm də diastolik arterial təzyiqin azalmasına kömək edə bilər.
Lent.az xarici mediaya istinadla xəbər verir ki, nar şirəsinin təsiri qəbul edilən miqdardan asılıdır.
2023-cü il araşdırması göstərib ki, gündəlik təxminən 300 ml nar şirəsi qəbul edən insanlarda sistolik təzyiq orta hesabla 6 mm civə sütunu qədər azalır. Daha yüksək dozalar sistolik təzyiqə əlavə təsir göstərməsə də, diastolik təzyiqin təxminən 3 mm civə sütunu azalmasına səbəb olur.
Tədqiqatlar göstərir ki, nar şirəsinin təsiri həm qısamüddətli, həm də uzunmüddətli ola bilər. Bəzi araşdırmalara görə, bu təsir iki aydan sonra zəifləyə bilər, digər nəticələr isə daha davamlı müsbət təsir olduğunu göstərir. Eyni zamanda, təsirin dərəcəsi insanın ilkin təzyiq göstəricilərindən də asılıdır. Məsələn, başlanğıc təzyiqi 130 mm civə sütunundan yüksək olan şəxslərdə daha aydın nəticələr müşahidə edilib.
Bununla yanaşı, nar şirəsinin təsiri hər zaman eyni olmur. Bəzi klinik tədqiqatlarda müsbət nəticələr qeydə alınsa da, digər hallarda əhəmiyyətli dəyişiklik müşahidə edilməyib. Həmçinin mütəxəssislər xəbərdarlıq edirlər ki, nar şirəsi bəzi dərmanlarla qarşılıqlı təsirə girə bilər. Xüsusilə hipertoniya dərmanları, statinlər, antidepressantlar və iltihab əleyhinə preparatların təsirini dəyişdirə bilər.
Nar tərkibində polifenollarla zəngin olan faydalı meyvədir. Bu maddələr antioksidant xüsusiyyətləri sayəsində arterial təzyiqin azalmasına kömək edir. Onlar orqanizmdə sərbəst radikalları zərərsizləşdirərək damarların elastikliyini qoruyur, qan damarlarını daraldan fermentlərin fəaliyyətini zəiflədir və azot oksidinin səviyyəsini artıraraq damarların genişlənməsinə şərait yaradır.
Ümumilikdə nar şirəsi təhlükəsiz hesab olunur və C və K vitaminləri, fol turşusu, kalium və maqnezium kimi faydalı maddələrlə zəngindir. Lakin bəzi insanlarda nadir hallarda mədə narahatlığı, ürəkbulanma, qəbizlik və ya ishal kimi yan təsirlər yarana bilər. Həmçinin tərkibində şəkərin yüksək olması səbəbindən şəkərli diabeti olan şəxslərə ehtiyatla istifadə etmək tövsiyə olunur.
Hadisənin gedişatını izləmək üçün ain.az saytında ən son yeniliklərə baxın.
