Ölkəmizdə dövlət tərəfindən idmana olan diqqət və qayğı göz qabağındadır
Azərbaycan idmanının son illərdə keçdiyi inkişaf yolu hər kəs üçün aydın və qürurvericidir. Bu gün ölkəmiz idman sahəsində əldə etdiyi nailiyyətlərlə yalnız regionda deyil, dünya miqyasında da tanınır.
Tiranada keçirilən Avropa çempionatında qazanılan bu böyük qələbə, sözsüz ki, yalnız idmançıların deyil, bütün xalqın sevincinə səbəb olub. Prezident öz çıxışında vurğulayıb ki, Azərbaycan güləşçiləri hər zaman olduğu kimi bu yarışda da peşəkarlıqlarını, iradələrini və qələbə əzmlərini ortaya qoyaraq Avropada lider olduqlarını bir daha sübut ediblər. Müasir dövrdə güləş kimi rəqabətin son dərəcə gərgin olduğu bir idman növündə bu cür nəticə əldə etmək, həqiqətən də böyük nailiyyət hesab olunur.
Dövlət tərəfindən idmana göstərilən diqqət və qayğı, yaradılan müasir infrastruktur, həyata keçirilən məqsədyönlü siyasət nəticəsində Azərbaycan idmanı keyfiyyətcə yeni mərhələyə qədəm qoymuşdur. Bu gün Azərbaycan idmançıları həm Olimpiya Oyunlarında, həm də dünya və Avropa çempionatlarında ölkəmizi ləyaqətlə təmsil edirlər.
Azərbaycan güləşinin güclənməsi təkcə idman uğuru deyil, həm də milli ruhun, iradənin və əzmkarlığın göstəricisidir. Hər bir qələbə bu sahəyə göstərilən diqqətin və uzunmüddətli strategiyanın nəticəsidir. Gənc idmançıların böyük yarışlarda uğur qazanması isə gələcək üçün daha parlaq perspektivlər vəd edir.Azərbaycan güləşində müşahidə olunan inkişaf həm sistemli idarəetmənin, həm də düzgün qurulmuş seleksiya və hazırlıq proseslərinin məntiqi nəticəsidir. Bu uğurlar göstərir ki, ölkəmizdə güləş idmanı davamlı şəkildə inkişaf edir və gələcəkdə daha böyük beynəlxalq nailiyyətlər qazanmaq üçün möhkəm baza formalaşıb.
Prezidentin qeyd etdiyi kimi İdman hər bir ölkənin qüdrətini nümayiş etdirir. Bu siyasət Azərbaycanın təkcə idman arenasında deyil, həm də ümumi inkişaf səviyyəsində liderliyini təmin edir.
Ağaverdi Əliverdiyev
YAP Qusar rayon təşkilatının əməkdaşı
