“Azərbaycanda quru sərhədlərin müəyyən yaş qrupları üçün güzəştli qaydada açılması məsələsi real görünmür”.
News365.az xəbər verir ki, bu fikirləri konkret.az-a açıqlamasında siyasi şərhçi Cavanşir Abbaslı səsləndirib.
“Yaş kateqoriyaları üzrə istisnaların tətbiqi praktik baxımdan mümkün deyil və belə bir addım ümumi məhdudiyyətlərin faktiki olaraq aradan qalxmasına gətirib çıxara bilər. Əgər müəyyən yaş qrupları üçün güzəştlər tətbiq olunsa, bu zaman məsələn, azyaşlıların sərhədi keçməsi üçün onları müşayiət edən şəxslər də orta yaş kateqoriyasına daxil ediləcək. Bu isə dolayısı ilə bütün yaş məhdudiyyətlərinin ləğvi deməkdir”.
Ekspert hesab edir ki, indiki şəraitdə belə bir diferensial yanaşma gözlənilən deyil:
“Əksinə, quru sərhədlərlə bağlı proseslərin mərhələli şəkildə normallaşması ehtimalı daha yüksəkdir. Azərbaycanın qonşu dövlətlərlə münasibətləri müsbət istiqamətdə inkişaf edir. Xüsusilə, Ermənistanla münasibətlərin normallaşması prosesi sürətlənib və yaxın gələcəkdə sülh müqaviləsinin imzalanacağı istisna deyil. İranla bağlı da əvvəlki gərginlik fonu zəifləyib. Bu amillər ümumilikdə regionda sabitliyin gücləndiyini göstərir”.
Siyasi şərhçi hesab edir ki, bütün bu faktorlar fonunda yaxın aylarda, ən gec isə gələn il quru sərhədlərin açılması ehtimalı artır. Beləliklə, yaş qruplarına görə xüsusi güzəştlərin tətbiqi real sayılmır, lakin ümumi sərhəd rejimində dəyişikliklərin baş verməsi gözlənilir.
