“Əgər tarixi ədalətdən danışılırsa, onda onu seçmə yanaşma ilə yox, bütöv şəkildə demək lazımdır”.
Bunu Hafta.az-a açıqlamasında Konstitusiya Araşdırmaları Mərkəzinin rəhbəri Əliməmməd Nuriyev bildirib.
Ə.Nuriyev bir qrup Azərbaycan QHT nümayəndəsinin Nyu-York meri Zohran Kvame Mamdaninin X platformasında səsləndirdiyi fikirlərlə bağlı ona açıq məktub ünvanladığını qeyd edib:
“Müraciətdə vurgulamışıq ki, Nyu-York merinin bəyanatları qəbuledilməzdir və məsuliyyətsiz siyasi yanaşmanın nümunəsidir. Tarixi hadisələri təhrif edərək və Azərbaycanın beynəlxalq hüquq çərçivəsində həyata keçirdiyi suverenlik addımlarını sual altına almaq, istər-istəməz dezinformasiya yaymaq deməkdir. Azərbaycan öz ərazi bütövlüyünü bərpa edib. Bu, mübahisə predmeti deyil. Bu, BMT səviyyəsində tanınmış hüquqi reallıqdır. Bu reallığı görməmək artıq mövqedən yox, ya məlumatsızlıqdan, ya da qərəzli yanaşmadan xəbər verir”.
Ə.Nuriyev bildirib ki, belə bəyanatlar təsadüfi deyil. O, qeyd edib ki, onlar illərdir regionda sülhə qarşı çıxan və revanşist gündəmi diri saxlamağa çalışan müəyyən dairələrin təsiri altında formalaşır:
"Bu, nə Nyu-York kimi qlobal şəhərin rəhbərinə yaraşır, nə də beynəlxalq məsuliyyət anlayışı ilə uzlaşır. Bu gün Cənubi Qafqazda yeni reallıq var. Münaqişə bitib. Sülh prosesi başlayıb. Bu mərhələdə bu cür məsuliyyətsiz çıxışlar yalnız bir məqsədə xidmət edir – sülhə mane olmaq və gərginliyi yenidən qızışdırmaq. Əgər tarixi ədalətdən danışılırsa, onda onu seçmə yanaşma ilə yox, bütöv şəkildə demək lazımdır. Xocalı faciəsi, illərlə davam edən işğal, viran qoyulmuş şəhərlər, məhv edilmiş məscidlər və bu gün də mina qurbanına çevrilən mülki insanlar – bunları görmədən “ədalət”dən danışmaq riyakarlıqdır. Biz hesab edirik ki, belə yanaşma ilə çıxış edən bir şəxsin Nyu-York kimi şəhəri təmsil etməsi əlavə məsuliyyət tələb edir. Bu baxımdan, Xocalı qurbanlarının xatirəsinə Nyu-Yorkda abidə ucaldılması təşəbbüsü yalnız simvolik yox, həm də prinsipial ədalət mesajı ola bilər. Bununla yanaşı, biz yenə də dialoqdan imtina etmirik. Lakin dialoq yalnız faktlara və reallığa əsaslandıqda mənalı olur. Biz meri bu reallıqlarla tanış etməyə hazırıq və bu mövzuda açıq, birbaşa müzakirəyə çağırırıq”.
