ain.az, Bizimyol portalına istinadən məlumat verir.
Meksika hökuməti bildirib ki, ölkənin şimalında yerləşən Çiuaaua ştatında həlak olan ABŞ vətəndaşları yerli əməliyyatlarda iştirak etmək üçün rəsmi icazəyə malik olmayıb.
Bizimyol.info xəbər verir ki, Meksikanın Təhlükəsizlik Kabineti və Xarici İşlər Nazirliyinin birgə bəyanatında qeyd olunub ki, “iki xarici vətəndaşdan heç biri ölkə ərazisində operativ tədbirlərdə iştirak üçün rəsmi akkreditasiyaya malik olmayıb”.
Açıqlamada vurğulanır ki, Meksika hakimiyyətində xarici agentlərin ölkə daxilində fiziki şəkildə əməliyyatlarda iştirak etmək niyyəti və ya fəaliyyəti barədə məlumat olmayıb. Miqrasiya qeydlərinə əsasən, həlak olan amerikalılardan biri ölkəyə “işləmək hüququ olmadan ziyarətçi” statusu ilə daxil olub, digəri isə diplomatik pasportla Meksikada olub.
Meksika hökuməti xatırladıb ki, milli qanunvericilik xarici agentlərin ölkə ərazisində əməliyyatlarda iştirakını qəti şəkildə qadağan edir. Bu sahədə beynəlxalq əməkdaşlıq yalnız məlumat mübadiləsi və texniki əlaqələndirmə mexanizmləri vasitəsilə, dövlət suverenliyinə tam hörmət əsasında həyata keçirilir. Hazırda hadisə ilə bağlı araşdırmalar ABŞ səfirliyi ilə koordinasiyalı şəkildə davam etdirilir.
Aprelin 19-da Çiuaaua ştatında baş verən insident zamanı iki meksikalı dövlət əməkdaşı və iki ABŞ vətəndaşı həlak olub. Meksika hökuməti bütün qurbanların ailələrinə başsağlığı verib və təhlükəsizlik məsələlərində Vaşinqtonla qarşılıqlı hörmət əsasında əməkdaşlığı davam etdirməyə hazır olduğunu bildirib.
Bundan əvvəl "The Washington Post" qəzeti mənbələrə istinadən yazıb ki, aprelin 19-da Meksikanın şimalında avtomobil qəzasında ölən ABŞ səfirliyinin iki əməkdaşı Mərkəzi Kəşfiyyat İdarəsi (CIA) agentləri olub. Qəzetin məlumatına görə, onlar narkotik istehsal edən laboratoriyaya qarşı keçiriləcək reydlə bağlı meksikalı təhlükəsizlik qüvvələri ilə görüşdən qayıdırmışlar. Bu fəaliyyət Vaşinqtonun narkotik qaçaqmalçılığına qarşı genişləndirilmiş proqramı çərçivəsində həyata keçirilirdi.
Bizimyol.info
Hadisənin gedişatını izləmək üçün ain.az saytında ən son yeniliklərə baxın.
