Nihat Məmmədli: “Səhvi başqalarında axtara bilmərəm”

Yunan-Roma güləşi üzrə Avropa üçüncüsü olmuş Nihat Məmmədli (60 kq) Tiranadakı yarışla bağl təəssüratlarını bölüşüb.

Arena.az xəbər verir ki, o, Azərbaycan Güləş Federasiyasının mətbuat xidmətinə açıqlamasında bunları söyləyib:

“Bu, artıq Avropa çempionatında 4-cü medalımdır. Buna görə şükür edirəm. Təbii ki, qızıl medalla qayıtmağı çox istərdim. İki Avropa çempionatında qızıl medal qazanmışdım. Bəzən hər şey istədiyin kimi olmur. Əlbəttə, səhvi başqalarında axtara bilmərəm. Bu yarışa kimi çox yaxşı təlim-məşq toplanışlarından keçmişdik. Çox yaxşı hazırlaşmışdıq komanda olaraq. Bundan sonra daha yaxşı hazırlaşıb, əlimdən gələni edəcəyəm ki, yenidən çempion olum”.

Xatırladaq ki, Albaniyanın paytaxtı Tiranada təşkil edilmiş yarışa 1/4 finaldan qoşulmuş Nihat Məmmədli (60 kq) ukraynalı Vladislav Kuzkoya şans tanımayıb – 5:0. Həmyerlimiz yarımfinalda ermənistanlı Suren Ağacanyana (tuş) uduzub. Nihat bürünc medal uğrunda görüşdə rusiyalı Suner Konunova 6:0 hesabıyla qalib gələrək Avropa üçüncüsü olub. Bu, onun analoji yarışlarda 4-cü (2 qızıl, 2 bürünc) medalı kimi tarixə düşüb.