"Ankara Ukrayna və Rusiya arasında birbaşa dialoq üçün platforma təklif edir..."
Türkiyə Ukrayna və Rusiya prezidentləri arasında birbaşa danışıqların təşkilinə hazır olduğunu açıqlayıb.
Moderator.az xəbər verir ki, bu barədə Türkiyənin xarici işlər naziri Hakan Fidan bəyan edib.
Türkiyənin vasitəçilik təklifi
Onun sözlərinə görə, prezident Rəcəb Tayyib Ərdoğan bu təşəbbüsü həm Vladimir Zelenski, həm də Vladimir Putin ilə təmaslarında şəxsən səsləndirib. Fidan vurğulayıb: "Türkiyə Ukraynada sülh prosesinin irəliləməsinə bütün səviyyələrdə dəstək verməyə hazırdır. Biz danışıqlar üçün platforma təqdim etməyə, təşkilati dəstək göstərməyə və tərəflər arasında konstruktiv dialoq üçün şərait yaratmağa hazırıq". O əlavə edib ki, belə görüşlərin baş tutması tərəflərin hazırlığından asılıdır.
Kiyevin mövqeyi
Ukrayna xarici işlər naziri Andrey Sibiqa bildirib ki, Kiyev artıq Türkiyəyə rəsmi müraciət edərək Zelenski ilə Putinin görüşünün təşkilini xahiş edib. Onun sözlərinə görə, bu görüşdə Ərdoğan və Trampın da iştirakı mümkündür. Sibiqa Türkiyə diplomatiyasının rolunu yüksək qiymətləndirərək deyib:
"Biz prezidentlər səviyyəsində görüşün təşkili imkanını nəzərdən keçirməyi xahiş etmişik. Biz bu görüşə hazırıq". O həmçinin qeyd edib ki, Rusiya tərəfi hələlik belə bir görüşdən yayınır: "Hazırda Putin gizlənir. Ukrayna prezidenti isə görüşə hazırdır. Biz bu müharibəni bitirmək istəyirik və real təkliflərimiz var".
Moskvanın yanaşması
Rusiya xarici işlər naziri Sergey Lavrov Ukrayna ilə danışıqların bərpasını "prioritet olmayan" məsələ kimi dəyərləndirib. Bununla belə, Moskva belə bir ehtimalı tam inkar etmir və onu "müsbət" qarşıladığını bildirir.
Zelenski isə daha əvvəl Putinlə mümkün görüşü şərh edərək bunun "düşmənlə görüş" olacağını deyib. Onun fikrincə, belə bir dialoq yalnız bir məqsədə - müharibənin dayandırılmasına və yenidən başlamamasına yönəlməlidir.
