Xəbər verdiyimiz kimi, aprelin 17-də Antalyada Azərbaycan Respublikasının Prezidenti İlham Əliyevlə Türkiyə Respublikasının Prezidenti Rəcəb Tayyib Ərdoğanın görüşü keçirilib.
"Unikal" xəbər verir ki, görüş zamanı Ərdoğan tərəflərin ticarət, enerji və müdafiə sahələrində əməkdaşlığı dərinləşdirmək və ikitərəfli münasibətləri yeni səviyyəyə qaldırmaq əzmində olduqlarını bildirib. O, Ankara və Bakının yaxın gələcəkdə atmaq niyyətində olduqları konkret addımların bu məqsədə çatmağa kömək edəcəyini qeyd edib. İrandakı münaqişə ilə bağlı Ərdoğan söyləyib ki, Türkiyə və Azərbaycan bunun mənfi nəticələrini yaşayır.
O, həmçinin, vurğulayıb ki, Ankara Azərbaycan və Ermənistan arasında davamlı sülhə nail olmaq səylərini alqışlayır və bu prosesi dəstəkləməyə davam edəcək.
Görüşdən sonra Azərbaycan və Türkiyə prezidentləri eyni avtomobildə məkanı tərk ediblər.
