"Eurostat" tərəfindən yayımlanan yeni demoqrafik proqnozlara görə, Avropa İttifaqı (Aİ) əhalinin kəskin azalması prosesinə daxil olur.
AFN.az xəbər verir ki, hesablamalar Aİ əhalisinin 2100-cü ilə qədər 11,7 faiz azalaraq təxminən 53 milyon nəfər itirəcəyini ortaya qoyur.
Demoqrafik artımın dərhal dayanacağı gözlənilmir. Proqnozlara görə, ittifaq əhalisi 2029-cu ildə 453 milyon nəfərlə zirvə nöqtəsinə çatacaq, lakin bu tarixdən etibarən başlayacaq uzunmüddətli tənəzzüllə birlikdə əsrin sonunda ümumi sayın 400 milyonun altına düşəcəyi təxmin edilir.
Demoqrafik dəyişiklik yalnız say azlığı ilə məhdudlaşmayacaq, həm də əhalinin strukturunu kökündən dəyişəcək. Belə ki, gənclərin və əmək qabiliyyətli insanların sayı sürətlə azalarkən, 80 və daha yuxarı yaşda olan şəxslərin ümumi əhali içindəki payının iki dəfədən çox artacağı gözlənilir.
Bu tənəzzülün əsas səbəbi kimi göstərilən doğum səviyyəsi hər qadına təxminən 1,3 uşaq nisbətinə qədər geriləyib ki, bu da əhalinin özünü bərpa etməsi üçün lazım olan həddən xeyli aşağıdır. Əhalinin qocalması Avropa miqyasında daha az işçi və daha çox təqaüdçü mənasına gəlir ki, bu da sosial sığorta və səhiyyə sistemləri üzərindəki maliyyə təzyiqini artırır.
Fransada 2025-ci ildə ölümlərin İkinci Dünya Müharibəsindən bəri ilk dəfə doğumları üstələməsi üzərinə Prezident Emmanuel Makron demoqrafik yenidənqurma çağırışı edərək ailələrə dəstək və gənclərin stimullaşdırılması üçün yeni planlar açıqlayıb. Avropa Parlamentinin araşdırmaları göstərir ki, miqrasiya son illərdə əhali itkisini müəyyən dərəcədə ləngitsə də, doğum nisbətindəki düşüşü tam kompensasiya edə bilmir.
Digər tərəfdən, Avropa daxilində miqrasiya siyasətinin sərtləşməsi bu balansı daha da çətinləşdirir. Məsələn, Almaniyada Kansler Fridrix Mers ölkədə yaşayan suriyalıların böyük bir hissəsinin yaxın üç il ərzində geri dönməsini nəzərdə tutan planı gündəmə gətirib.
