ABŞ, Kanada və Meksikanın birgə ev sahibliyi edəcəyi Dünya Çempionatı ərəfəsində ABŞ-dakı otellər otaq qiymətlərində endirim etməyə başlayıblar.
AFN.az xəbər verir ki, turizm sektoru nümayəndələri həddindən artıq baha olan bilet qiymətləri, inflyasiya narahatlığı və ABŞ-a qarşı artan narazılıq kimi amillərin azarkeşləri bu böyük idman tədbirindən uzaqlaşdırdığı barədə xəbərdarlıq edirlər.
"Lighthouse Intelligence" məlumatlarına görə, Atlanta, Dallas, Mayami, Filadelfiya və San-Fransisko kimi ev sahibi şəhərlərdə oyun günləri üçün otaq qiymətləri ilin əvvəlindəki pik nöqtəsi ilə müqayisədə təxminən üçdə bir nisbətində ucuzlaşıb. FİFA prezidenti Canni İnfantinonun 2024-cü ildəki "yüz minlərlə ziyarətçi" proqnozuna baxmayaraq, tələb gözləntilərin çox altında qalıb.
Nyu-York Otellər Birliyinin rəhbəri Vicay Dandapani ziyarətçi sayında artım olsa da, bunun FİFA-nın vəd etdiyi bolluq səviyyəsində olmadığını bildirib. "CoStar" məlumatlarına görə, FİFA-nın texniki heyət və komandalar üçün ayırdığı minlərlə otağı ləğv etməsi, oyunlar arasındakı dövrlərdə otellərdə ciddi boşluqların yaranmasına səbəb olub.
Rezervasiyalara mane olan əsas faktorlar arasında ABŞ Prezidenti Trampın immiqrasiya siyasətinə qarşı reaksiyalar və İranla yaşanan müharibənin yaratdığı qeyri-sabitlik xarici turistləri çəkindirir. "Football Supporters Europe" təşkilatının məlumatına görə, bir azarkeşin öz komandasını finala qədər izləməsinin maliyyə xərci ən azı 6900 dollar təşkil edir ki, bu da Qətərdəki əvvəlki turnirin xərclərindən təxminən beş dəfə çoxdur.
Yaxın Şərqdəki münaqişələrin tətiklədiyi enerji böhranı həm inflyasiya qorxusunu artırır, həm də təyyarə bileti qiymətlərini bahalaşdırır. "Tourism Economics" analizləri ABŞ-a gələcək beynəlxalq ziyarətçi artımı proqnozunu 3,9 faizdən 3,4 faizə endirib. Analitiklər otellərin yüksək qiymətlərlə uzunmüddətli qonaqlama gözləntisinin reallıqla üst-üstə düşmədiyini, avropalı azarkeşlərin bu yüksək xərclər səbəbindən 2030-cu ildə İspaniya, Portuqaliya və Mərakeşdə keçiriləcək turniri gözləməyə üstünlük verə biləcəklərini qeyd edirlər.
