Argentinada bir çoban təsadüfən təxminən 155 milyon il yaşı olan nəhəng dinozavrın qalıqlarına rast gəlib...
Poliqon xəbər verir ki, bu barədə Spiegel nəşri yazır.
Söhbət əvvəllər elmə məlum olmayan uzunboyunlu dinozavrdan gedir və ona Bicharracosaurus dionidei adı verilib. Alimlərin qiymətləndirməsinə görə, bu dinozavrın uzunluğu təxminən 20 metrə çata bilərdi.
Məlumata görə, fosili tapan çoban Dionide Mesanın şərəfinə növün adı verilib. Bicharraco sözü isə ispan dilində "böyük heyvan" mənasını verir. Tapıntı hazırda Eçidio Ferullo Paleontologiya Muzeyində saxlanılır.
Qalıqlar arasında 30-dan çox boyun, döş və quyruq fəqərəsi, bir neçə qabırğa və çanaq hissələri aşkarlanıb. Sümük quruluşu göstərir ki, bu, yetkin bir fərd olub və qədim Qondvana superqitəsində yaşayıb.
Skelet bəzi xüsusiyyətlərinə görə Afrikada yaşamış Giraffatitan-a (braxiozavr qohumu) bənzəyir. Digər tərəfdən, bəzi struktur detallar Şimali Amerikada yaşamış Diplodocus-la da oxşarlıq göstərir.
Uzunboyunlu dinozavrlar – sauropodlar – Yer tarixinin ən böyük quru heyvanları sayılır. Onların bəziləri 40 metrə qədər uzunluğa çata bilirdi.
Tədqiqat müəllifi, Münhen Universitetinin doktorantı Aleksandra Reutter bildirib ki, bu tapıntı Cənubi Amerikada Yura dövrünə aid braxiozavr qohumlarının mövcudluğunu göstərən ilk dəlillərdən biri ola bilər.
Araşdırma rəhbəri Oliver Rauşut isə qeyd edib ki, bu kəşf sauropodların təkamülü barədə mövcud biliklərdəki boşluqları doldurmağa kömək edir. İndiyə qədər əsas məlumatlar daha çox Şimal yarımkürəsindən gəlirdi, Cənubda isə əsasən Tanzaniyadakı bir bölgə mühüm sayılırdı. Yeni tapıntı Argentinanın Çubut əyalətində bu xəritəni genişləndirir.
Poliqon.info
