Müdafiə naziri postuna gəldikdən sonra həyata keçirilən kadr dəyişiklikləri ABŞ ordusunda siyasiləşmə və rəhbər heyətin “təmizlənməsi” barədə narahatlıqları gücləndirib...
Poliqon xəbər verir ki, bu barədə The Economist məlumat yayıb.
Məlumata görə, ABŞ-nin müdafiə naziri Pit Heqset vəzifəyə başladığı vaxtdan bəri hərbi və siyasi dairələrdə özünə qarşı narazılığı getdikcə artırır. Nəşr bildirir ki, Heqset indiyədək azı 21 generalı vəzifədən uzaqlaşdırıb və bu proses Vaşinqtonda ciddi rezonans doğurub.
Bildirilir ki, ən çox diqqət çəkən hadisələrdən biri ABŞ ordusunun baş qərargah rəisi general Rendi Corcun, eləcə də daha iki yüksək vəzifəli hərbi rəhbərin İran əleyhinə aktiv hərbi kampaniya dövründə vəzifədən çıxarılması olub. Bu addım həm hərbi strukturlar daxilində, həm də siyasi çevrələrdə ciddi suallar yaradıb.
Hərbi icma daxilindəki mənbələr baş verənləri ordunun siyasiləşdirilməsi və rəhbər heyətdə “təmizləmə” prosesi kimi xarakterizə edirlər. Onların fikrincə, Heqset daha sərt və ideoloji çalarlarla yüklənmiş hərbi mədəniyyət konsepsiyasını irəli sürməyə çalışır. Bu yanaşmanın isə ABŞ silahlı qüvvələrinin ənənəvi bitərəfliyinə və peşəkar sabitliyinə zərbə vura biləcəyi vurğulanır.
Nəşr qeyd edir ki, belə kadr qərarları təkcə müdafiə idarəçiliyində daxili gərginliyi artırmır, eyni zamanda ordunun siyasi proseslərdən kənarda qalması prinsipini də şübhə altına alır. ABŞ-də silahlı qüvvələrin qeyri-partiyalı xarakteri uzun illər milli təhlükəsizlik sisteminin əsas dayaqlarından biri hesab olunub və bu prinsipin zəifləməsi ciddi institusional nəticələr doğura bilər.
Müşahidəçilərin fikrincə, Heqsetin atdığı addımlar orduda idarəetmə balansını poza, yüksək komandanlıq səviyyəsində etimad böhranı yarada və ABŞ hərbi sistemində peşəkarlıqla siyasi loyalıq arasındakı sərhədləri daha da bulanıqlaşdıra bilər.
Poliqon.info
