ABŞ prezidentinin Avropada populyar olmaması, onun ideoloji müttəfiqlərinin belə İranla müharibəyə qarşı çıxması və Qrenlandiya ilə bağlı bəyanatlarından narahatlıq keçirməsi fonunda Orbanın seçki məğlubiyyəti MAGA hərəkatının beynəlxalq nüfuzuna zərbə kimi qiymətləndirilir...
Poliqon xəbər verir ki, The Washington Post nəşri Viktor Orbanın məğlubiyyətini Donald Trampın siyasi hərəkatının qlobal təsir imkanlarının məhdudluğunu göstərən hadisə kimi dəyərləndirib. Nəşrin təhlilinə görə, ABŞ prezidenti Avropada populyarlıq qazana bilməyib və onun ideoloji baxımdan yaxın sayılan müttəfiqləri belə bir sıra əsas məsələlərdə Vaşinqtonun xəttinə açıq şəkildə etiraz ediblər.
Məqalədə qeyd olunur ki, Trampın tərəfdarları sırasında yer alan bəzi Avropa sağçı qüvvələri belə İranla müharibəyə qarşı çıxıb. Eyni zamanda, onların ABŞ prezidentinin Danimarkanın muxtar ərazisi olan Qrenlandiyanı ələ keçirməklə bağlı səsləndirdiyi təhdidlərdən ciddi şəkildə narahat olduqları vurğulanır.
Nəşr yazır ki, Viktor Orban seçkiləri “Qərbin ruhu” uğrunda mübarizə kimi təqdim edirdi. ABŞ vitse-prezidenti Cey Di Vens də Vaşinqton və Budapeşti “Qərb sivilizasiyasının müdafiəsinin qalası” adlandırmışdı. Bu yanaşma fonunda Macarıstan Orban dövründə MAGA hərəkatının ideologiyasında və siyasi mifologiyasında ölçüsündən daha böyük yer tutmağa başlamışdı.
Bildirildiyinə görə, Macarıstan iqtisadi göstəricilərinə görə Avropa İttifaqının əksər ölkələrindən geri qalsa da, Orban bütün dünyada populist sağ mühafizəkar qüvvələr üçün rəmzi fiqura çevrilmişdi. O, bir çox dairələrdə yalnız hökumət başçısı deyil, həm də liberal siyasi modelə qarşı alternativ xəttin simvolu kimi təqdim olunurdu.
Lakin The Washington Postun qənaətinə görə, Orbanın məğlubiyyəti göstərdi ki, Trampçı siyasi modelin və onun beynəlxalq tərəfdar şəbəkəsinin təsir imkanları düşündükləri qədər sərhədsiz deyil. Xüsusilə Avropada seçici davranışı və ictimai rəy MAGA düşərgəsinin ideoloji təsirini məhdudlaşdıran əsas faktor kimi ortaya çıxır.
Beləliklə, nəşr hesab edir ki, Macarıstandakı seçkinin nəticəsi təkcə ölkədaxili hakimiyyət dəyişikliyi deyil, eyni zamanda Trampın qlobal siyasi təsirinə dair daha geniş müzakirələr üçün mühüm siqnal rolunu oynayır.
Poliqon.info
