Tehranın analitik hesabatına görə, ABŞ-nin mümkün addımları qlobal ticarət marşrutlarını iflic vəziyyətə sala bilər...
Poliqon xəbər verir ki, İranın dövlət televiziyası olan Press TV tərəfindən yayılan analitik hesabatda ABŞ-nin Hörmüz boğazına qarşı mümkün addımlarının ciddi regional və qlobal nəticələr doğuracağı bildirilib. Sənəddə vurğulanır ki, Donald Trump administrasiyası bu strateji su yolunda hər hansı məhdudlaşdırıcı tədbir görərsə, cavab addımları digər mühüm geosiyasi nöqtədə – Bəb əl-Məndəb boğazı istiqamətində atıla bilər.
Qeyd olunur ki, ABŞ-nin Hörmüz boğazı üzərindən gəmiçiliyi məhdudlaşdırmaq və ya hərbi gücdən istifadə etmək cəhdləri regionda simmetrik cavab reaksiyasına səbəb olacaq. İranlı ekspertlər hesab edir ki, belə bir ssenaridə Qərbin Bəb əl-Məndəb boğazı üzərində nəzarəti ciddi təhlükə altına düşə bilər.
Analitiklər bildirirlər ki, hər iki boğaz dünya enerji tədarükü və beynəlxalq ticarət üçün həyati əhəmiyyət daşıyır. Hörmüz boğazı vasitəsilə gündəlik olaraq milyonlarla barel neft daşınırsa, Bəb əl-Məndəb Qırmızı dəniz ilə Hind okeanı arasında əsas tranzit qovşaqlarından biri hesab olunur. Bu marşrutların pozulması qlobal enerji bazarlarında kəskin qiymət artımına və logistika zəncirlərinin iflicinə gətirib çıxara bilər.
Sənəddə həmçinin vurğulanır ki, belə bir qarşıdurma yalnız region ölkələrini deyil, Avropa və Asiya bazarlarını da ciddi şəkildə təsirləndirəcək. Ekspertlər hesab edir ki, strateji boğazlar ətrafında eskalasiyanın artması beynəlxalq təhlükəsizlik mühitini daha da gərginləşdirə və genişmiqyaslı iqtisadi nəticələrə səbəb ola bilər.
Müşahidəçilər qeyd edirlər ki, bu cür açıqlamalar Tehran tərəfindən mümkün hərbi-siyasi ssenarilərə qarşı öncədən xəbərdarlıq xarakteri daşıyır və regionda qüvvələr balansının nə qədər həssas olduğunu bir daha göstərir.
Poliqon.info
