Sia Az saytından verilən məlumata əsasən, ain.az məlumatı açıqlayır.
Azərbaycan Respublikası ilə Gürcüstan Respublikası arasında münasibətlər tarixən dostluq, qarşılıqlı hörmət və strateji tərəfdaşlıq prinsiplərinə əsaslanmışdır. Bu iki qonşu dövlət Cənubi Qafqaz regionunda sabitliyin, təhlükəsizliyin və iqtisadi inkişafın təmin olunmasında mühüm rol oynayır. Azərbaycan və Gürcüstan xalqları əsrlər boyu eyni coğrafiyada yaşamış, ortaq tarixi və mədəni dəyərləri bölüşmüşdür. Hər iki xalq arasında formalaşmış qarşılıqlı etimad və dostluq münasibətləri müasir dövrdə dövlətlərarası əməkdaşlığın möhkəm təməlini təşkil edir. Müstəqillik əldə etdikdən sonra bu əlaqələr daha da inkişaf edərək strateji tərəfdaşlıq səviyyəsinə yüksəlmişdir.Azərbaycan-Gürcüstan münasibətlərinin inkişafında Ulu Öndər Heydər Əliyevin müstəsna xidmətləri olmuşdur. Onun uzaqgörən siyasəti nəticəsində iki ölkə arasında siyasi, iqtisadi və enerji sahələrində əməkdaşlıq möhkəm əsaslar üzərində qurulmuşdur. Heydər Əliyev hər zaman regionda sabitliyin qorunmasının vacibliyini vurğulayaraq, Azərbaycan ilə Gürcüstan arasında etibarlı tərəfdaşlığın formalaşdırılmasına nail olmuşdur. Məhz onun təşəbbüsü ilə həyata keçirilən iri enerji və nəqliyyat layihələri bu gün də hər iki ölkənin inkişafına xidmət edir. Bu siyasət nəticəsində Bakı-Tbilisi-Ceyhan neft kəməri, Bakı-Tbilisi-Ərzurum qaz kəməri kimi strateji layihələr reallaşdırılmış və regionun enerji xəritəsi dəyişdirilmişdir.Azərbaycan və Gürcüstan arasında münasibətlər bu gün strateji tərəfdaşlıq səviyyəsindədir. Xüsusilə enerji, nəqliyyat və logistika sahələrində əməkdaşlıq geniş vüsət almışdır. Bakı-Tbilisi-Qars dəmir yolu layihəsi, Cənub Qaz Dəhlizi kimi beynəlxalq əhəmiyyətli təşəbbüslər iki ölkənin əməkdaşlığının uğurlu nəticəsidir. Bu layihələr təkcə Azərbaycan və Gürcüstan üçün deyil, bütövlükdə Avropa və Asiya arasında əlaqələrin güclənməsi baxımından mühüm rol oynayır. Eyni zamanda ticarət əlaqələri də ildən-ilə genişlənir, qarşılıqlı investisiyalar artır, turizm və humanitar sahələrdə əməkdaşlıq dərinləşir.Azərbaycan Respublikasının Prezidenti cənab İlham Əliyev tərəfindən Ulu Öndərin müəyyən etdiyi strateji xətt uğurla davam etdirilir. Onun rəhbərliyi ilə Azərbaycan-Gürcüstan münasibətləri yeni mərhələyə qədəm qoymuş, əməkdaşlıq daha da genişlənmişdir. Cənab Prezidentin Gürcüstana son səfəri də bu münasibətlərin yüksək səviyyədə olduğunu bir daha nümayiş etdirmişdir. Səfər çərçivəsində keçirilən görüşlərdə iki ölkə arasında iqtisadi əməkdaşlığın genişləndirilməsi, enerji təhlükəsizliyi, nəqliyyat dəhlizlərinin inkişafı və regional sabitlik məsələləri müzakirə olunmuşdur. Prezident İlham Əliyev çıxışlarında vurğulamışdır ki, Azərbaycan və Gürcüstan arasında əlaqələr dostluq və qardaşlıq prinsiplərinə əsaslanır və bu münasibətlər gələcəkdə daha da möhkəmlənəcəkdir.Azərbaycan və Gürcüstan regionda sülhün və sabitliyin qorunmasında mühüm rol oynayan tərəfdaş dövlətlərdir. Hər iki ölkə beynəlxalq layihələrdə fəal iştirak edir, enerji və nəqliyyat dəhlizlərinin inkişafına töhfə verir. Gələcək perspektivlər baxımından bu əməkdaşlığın daha da genişlənəcəyi gözlənilir. Xüsusilə rəqəmsallaşma, logistika, yaşıl enerji və innovasiya sahələrində yeni layihələrin həyata keçirilməsi iki ölkə üçün yeni imkanlar açır. İki ölkə arasında strateji tərəfdaşlıq regionun inkişafına, sabitliyinə və beynəlxalq əməkdaşlığın güclənməsinə mühüm töhfə verməkdə davam edir. Azərbaycan-Gürcüstan münasibətləri gələcəkdə də daha da möhkəmlənəcək və yeni uğurlara imza atacaqdır.
YAP Qəbələ rayon təşkilatının sədri Abil Ağasəfov.
Sonrakı hadisələr barədə daha çox məlumat almaq üçün ain.az saytını izləyin.
