Rusiya Ayda özünün xüsusi ərazisini yaratmaq niyyətindədir. Bunu Rusiya Elmlər Akademiyasının vitse-prezidenti Sergey Çernışov rəyasət heyətinin iclasında deyib. Onun sözlərinə görə, federal Kosmik Elm layihəsinin həyata keçirilməsi zamanı Ayda özünün "suveren ərazilərini" yarada biləcək.
."Ay proqramı Rusiyanın Ayı fəal şəkildə araşdıran aparıcı kosmik güclər arasında qalmasına kömək edəcək. Bu, Ayın tədqiqi üçün yeni biliklər və texnologiyalar təmin edəcək. Nəticədə, bu, bizə Ay səthində suveren Rusiya əraziləri yaratmağa imkan verəcək", - deyə akademik bildirib.
Çernışov qeyd edib ki, Ay proqramı iki mərhələdə həyata keçiriləcək. Birinci mərhələ texnologiyaların mənimsənilməsini, lazımi enişləri və hətta Yer peykinin səthində tədqiqatların aparılmasını əhatə edir.
Akademikin sözlərinə görə, ikinci addım ay bazalarının elementlərinin yaradılması və eniş yerlərindən "ayrılan texnologiya"nın istifadəsidir.
Akademiki Anatoli Petrukoviçin sözlərinə görə, 2036-cı ilə qədər federal ay layihəsinin büdcəsi təxminən 700 milyard rubl təşkil edir (bütün milli "Kosmos" layihəsinin maliyyələşdirilməsi 4,4 trilyon rubldur).
Xatırladaq ki, Ayın və digər səma cisimlərinin ərazi mülkiyyəti 1967-ci ildə qəbul edilmiş Kosmos Müqaviləsi ilə tənzimlənir. Müqavilədə deyilir ki, "Ay və digər səma cisimləri də daxil olmaqla, kosmos suverenlik iddiası, istifadə və ya işğal yolu ilə və ya hər hansı digər vasitələrlə milli mənimsənilməyə məruz qalmır".
Əziz MUSTAFA
