Həmin şəxs Rusiya cəza koloniyasında cəza çəkərkən hərbi müqavilə imzalayıb. O, düşərgədə yaralandıqdan sonra qaçıb.
Qaziler.az uznews.uz-a istinadən bildirir ki, Karaulbazar Rayon Cinayət Məhkəməsi muzdlu kimi təqsirləndirilən 31 yaşlı A. O.-ya qarşı işə baxıb.
İş materiallarına görə, təqsirləndirilən şəxs 2021-ci ilin sentyabr ayında işləmək üçün Rusiyaya gedib. 2022-ci ildə oğurluq ittihamı ilə beş il müddətinə azadlıqdan məhrum edilib.
2025-ci ilin sentyabr ayında cəzasını çəkərkən ona hərbi müqavilə təklif edilib. O, təzyiq və işgəncələrdən qaçmaq üçün bu addımı atdığını bildirib.
Oktyabr ayında o, Luqansk bölgəsinə göndərilib. Düşərgədə hərbi təlim keçib və bu müddət ərzində sağ çiynindən güllə yarası alıb. Daha sonra Luqanskdakı hərbi hospitala göndərilib və orada təxminən 20 gün müalicə alıb. Daha sonra o, qaçaraq Rostovdakı Özbəkistan konsulluğuna gəlib və orada baş verənləri danışıb.
31 oktyabrda ona vətənə qayıtmaq haqqında sənəd verilib və bundan sonra o, 3 noyabrda Daşkəndə qayıdıb.
Məhkəmədə kişi günahını etiraf edib, peşman olduğunu bildirib və məhkəmədən cəzasının yüngülləşdirilməsini istəyib.
Məhkəmə vətəndaş A. O.-nu Özbəkistan Respublikası Cinayət Məcəlləsinin 154-cü maddəsinin 1-ci hissəsində (muzdluluq) nəzərdə tutulan cinayəti törətməkdə təqsirli bilib və ona dörd il azadlığın məhdudlaşdırılması cəzası verilib.
QAZİLER.AZ
