“General Atomics Aeronautical Systems, Inc.” (GA-ASI) şirkətinin inkişaf etdirdiyi YFQ-42A pilotsuz döyüş təyyarəsinin (PDT) prototipi sınaq zamanı qəzaya uğrayıb.
“Poliqon” GA-ASI-yə istinadən xəbər verir ki, prototip şirkətin Kaliforniyadakı aerodromundan havaya qalxdıqdan sonra qəza baş verib.
Hadisə nəticəsində xəsarət alan olmayıb. Ehtiyat tədbiri olaraq uçuş sınaqları müvəqqəti dayandırılıb.
GA-ASI PDT-nin vəziyyətini qiymətləndirir və hadisənin əsas səbəbini müəyyən etmək üçün araşdırma aparır.
Şirkətin bildirdiyinə görə, ilkin mərhələdə hadisənin hansı şəraitdə baş verdiyi ilə bağlı fərziyyə irəli sürmək tezdir: “Hər bir proqramda olduğu kimi, baş verənləri dəqiq anlamaq üçün sistemli araşdırma prosesi aparılır və hazırda əsas diqqət məlumatların toplanmasına və bu hadisədən nəticə çıxarmağa yönəlib”.
