Rusiyada Azərbaycanəsilli eks-məmurun əmlakı müsadirə edildi

Moskvanın Doroqomilovski Rayon Məhkəməsi Dağıstan daxili işlər nazirinin keçmiş müavini Rüfət İsmayılovun yarım milyard rubl dəyərində əmlakını müsadirə edib. 

Redaktor.az xəbər verir ki, bu barədə "RİA Novosti" məhkəmənin Mətbuat xidmətinə istinadən məlumat yayıb. 

Müsadirə iddiası ilə məhkəməyə Rusiyanın Baş Prokurorluğu müraciət edib. Prokurorluq antikorrupsiya qanunvericiliyinin pozulmasına görə İsmayılovun və daha dörd cavabdehin əmlakının müsadirə edilməsini tələb edib. Keçmiş nazir müavininin müsadirə edilən əmlakı 533,6 milyon rubl (təxminən 11 milyon 755 min AZN) dəyərində qiymətləndirilir. 

Ümumilikdə, ona qarşı üç cinayət işi qaldırılıb. Belə ki, İsmayılov və müavini cinayət işlərinə xitam vermək müqabilində rüşvət almaqda, həmçinin vəzifə səlahiyyətlərini aşmaqda ittiham edilirlər. 

Qeyd edək ki, İsmayılov və müavini Dalqat Abdulqapurov 7 noyabr 2023-cü ildə Federal Təhlükəsizlik Xidmətinin (FTX) əməkdaşları tərəfindən saxlanılıblar. 1975-ci il təvəllüdlü Rüfət İsmayılov Dağıstanın Dərbənd şəhərində azərbaycanlı ailəsində dünyaya gəlib. Onun atası hakim Hikmət İsmayılov Dağıstanda hakim vəzifəsində çalışıb.