Müasir həyat tərzi bizi saatlarla masa arxasında və ya ekran qarşısında oturmağa məcbur edir. Lakin bədənimiz bu durğunluğa etiraz etdikdə müəyyən siqnallar göndərir.
Pravda.az daha çox hərəkət etməli olduğunuzu göstərən 5 əsas əlaməti təqdim edir:
Davamlı yorğunluq hissi
Paradoksal görünsə də, az hərəkət etmək sizi daha çox yorur. Enerji səviyyənizin aşağı düşməsinin səbəbi bədəndə qan dövranının zəifləməsidir. Kiçik bir gəzinti belə hüceyrələrə daha çox oksigen daşıyaraq sizi gümrahlaşdıra bilər.
Oyananda bədəndəki sərtlik
Səhərlər yataqdan qalxanda oynaqlarınızda və əzələlərinizdə ağrı və ya kütlük hiss edirsinizsə, bu, gün ərzində yetərincə hərəkət etməməyinizdən qaynaqlana bilər.
Həzm problemləri və qəbizlik
Həzm sistemi əzələ hərəkətləri ilə birbaşa bağlıdır. Az hərəkət etdikdə bağırsaqların işləmə sürəti yavaşlayır. Maddələr mübadiləsini sürətləndirmək üçün gündəlik fiziki aktivlik şərtdir.
Diqqət dağınıqlığı və unutqanlıq
Fiziki aktivlik beyində yeni neyronların yaranmasını stimullaşdırır. Əgər son zamanlar fokuslanmaqda çətinlik çəkirsinizsə, bu, beyninizin daha çox qan dövranına və oksigenə ehtiyacı olduğunu göstərir.
Çəki artımı
Hərəkətsizlik bədənin insulini idarə etməsini çətinləşdirir. Bu isə sizin tez-tez acmanıza və xüsusilə şirin qidalara meyl etmənizə səbəb olur.
İdman zalına getməyə vaxtınız yoxdursa, hər saatdan bir 5 dəqiqəlik ayaqüstü fasilələr verin və ya pilləkənlərdən istifadə edin.
Əminə Bayramova
