Qarabağ müharibəsi veteranı Sea Breeze-də onlarla işçinin əməkhaqqı almadığını bildirir...
Qarabağ müharibəsi veteranı Bakı şəhərinin Nardaran qəsəbəsində yerləşən Sea Breeze layihəsində çalışan onlarla işçinin əməkhaqqının ödənilmədiyini iddia edib.
Poliqon xəbər verir ki, veteran bu barədə sosial şəbəkədə paylaşdığı video müraciətdə məlumat verib.
Veteranın sözlərinə görə, layihədə fəaliyyət göstərən podratçı təşkilat 26 nəfər tikinti işçisinə ümumilikdə 14 000 manat məbləğində əməkhaqqını ödəməyib. O bildirib ki, bu hal yalnız tikinti işçiləri ilə məhdudlaşmır, eyni zamanda 10 nəfər qadın təmizlik işçisi də eyni vəziyyətlə üzləşib.
Müraciət müəllifi qeyd edib ki, söhbət ağır şəraitdə çalışan insanların zəhmət haqqından gedir və bu məsələdə ədalətin bərpa olunması vacibdir. O, aidiyyəti qurumları və məsul şəxsləri problemin həlli üçün tədbir görməyə çağırıb.
Məsələ ilə bağlı Sea Breeze layihəsinin nümayəndələri bildiriblər ki, daxil olan şikayət podratçı şirkətə yönləndirilib və hazırda vəziyyətin araşdırılması aparılır.
Ekspertlər qeyd edirlər ki, bu kimi hallar tikinti sektorunda podratçı münasibətlərində şəffaflığın və nəzarət mexanizmlərinin gücləndirilməsinin vacibliyini bir daha gündəmə gətirir.
Poliqon.info
