Ermənistanın Baş naziri Nikol Paşinyan Moskvaya etdiyi son işgüzar səfərinin yekunlarını şərh edərək, danışıqların yüksək səviyyədə keçdiyini bildirib.
Musavat.com xəbər verir ki, hökumət başçısı Rusiya rəsmiləri ilə keçirilən görüşlərdə bir çox strateji sahələrdə ortaq məxrəcə gəldiklərini bəyan edib.
Paşinyan jurnalistlərə açıqlamasında qeyd edib ki, tərəflər arasında həm humanitar, həm də strateji məsələlər ətrafında geniş fikir mübadiləsi aparılıb. Onun sözlərinə görə, əldə olunmuş razılaşmalar mədəniyyət, təhsil və iqtisadiyyatla yanaşı, hərbi-texniki əməkdaşlıq kimi həssas sahələri də əhatə edir. Baş nazir bu razılaşmaların yaxın gələcəkdə hər iki ölkə üçün konkret nəticələr verəcəyinə əminliyini ifadə edib.
Xüsusilə hərbi-texniki sahədə əməkdaşlığın davam etdirilməsi vurğulanıb ki, bu da regiondakı mövcud hərbi-siyasi vəziyyət fonunda xüsusi diqqət çəkir. Ekspertlər Paşinyanın bu optimist açıqlamasını son dövrlər Rusiya-Ermənistan münasibətlərində yaranmış soyuqluğu aradan qaldırmaq cəhdi kimi qiymətləndirirlər.
Səfər çərçivəsində həmçinin enerji təhlükəsizliyi və regional nəqliyyat kommunikasiyalarının açılması məsələlərinin də müzakirə edildiyi ehtimal olunur. Paşinyan əlavə edib ki, Moskva ilə dialoqun intensivləşdirilməsi Ermənistanın xarici siyasət prioritetləri sırasında qalmağa davam edir.
Musavat.com
