ain.az, Idman.biz saytından verilən məlumata əsaslanaraq xəbər yayır.
Azərbaycan kökənli olan Roman Kərimov futbol üzrə ABŞ və Kanadanın ən yüksək liqası - MLS-də təmsil olunan “Hyuston Dinamo”sunun qapıçısıdır. Roman Moskvada anadan olub: anası rusdur, atasının xətti ilə babası isə azərbaycanlıdır. 18 yaşlı futbolçu Rusiyada Mərkəzi Ordu İdman Klubunun və “Rodina”nın akademiyasında çıxış edib. 14 yaşında ABŞ-yə köçüb və ilk klubu “LA Serf” futbol klubu olub.
Bu yaxınlarda mediada Roman Kərimovun Azərbaycan millisində oynamaq istədiyi barədə məlumat yayılıb.
İdman.Biz gənc futbolçu ilə əlaqəyə çıxaraq onunla bu mövzu, həmçinin ABŞ futbolu, təhsili və hədəfləri barədə danışıb.
- Bizə futbol yolunuz barədə danışın.
- Atam böyük futbol azarkeşidir. Xatırlayıram ki, biz həmişə televiziyada MOİK-in oyunlarına baxır və matçlara gedirdik. Təxminən beş yaşımda adi həyət bölməsində futbolla məşğul olmağa başladım. Orada həm qapıçı, həm də meydan oyunçusu kimi çıxış edirdim - hər iki mövqedə oynamaq xoşuma gəlirdi.
Sonra valideynlərim məni baxış üçün MOİK-ə apardılar və məni sol cinah yarımmüdafiəçisi kimi qəbul etdilər. Yadımdadır ki, bir müddət sonra komandada qapıçı çatışmazlığı yarandı. Mən ən hündür oyunçu idim və məşqçi məni qapıya qoydu. O vaxtdan bu mövqedə oynayıram.
Daha çox oyun şansı qazanmaq üçün bir neçə ildən sonra Moskvanın “Rodina” klubuna keçdim və 14 yaşımadək – ABŞ-yə, Los-Ancelesə köçənədək orada çıxış etdim. Amerikada “LA Serf” klubunda oynadım. “Hyuston Dinamo”nun nümayəndələri oyunlarıma baxdılar, məni baxışa dəvət etdilər və nəticədə komandaya qəbul etdilər.
- Ailəniz ABŞ-yə necə köçdü?
- Valideynlərim boşanıblar. Atam hələ də Rusiyada yaşayır, anam isə çoxdan ABŞ-yə köçmək istəyirdi və nəhayət buna qərar verdi. Mənim Moskvada qalmaq variantım var idi, amma düşündüm ki, niyə də ABŞ-də oynamağı sınamayım? Əlbəttə, qorxulu idi, çünki burada futbolun necə təşkil olunduğunu və səviyyəsinin necə olduğunu bilmirdim.
Məlum oldu ki, burada yeniyetmə futbolu çox inkişaf edib: bütün şəhərlərdə həm oğlanlar, həm də qızlar üçün çoxlu klublar və liqalar var. Anam mənə komanda tapmağa kömək etdi və xoşbəxtlikdən hər şey yaxşı alındı.
- Köçəndə ingilis dilini bilirdiniz?
- İngilis dilim zəif idi: bir neçə söz və sadə qrammatik qayda bilirdim. Buna görə ilk il kifayət qədər çətin keçdi, əsasən rusdilli insanlarla ünsiyyət qururdum. Bir ildən sonra Hyustona köçəndə məni qəbul edən ailənin evinə yerləşdirdilər. Bu, klubun başqa şəhərdən gələn oyunçunu yerləşdirməsi üçün pul ödədiyi adi ingilisdilli ailə idi. Bunun sayəsində adaptasiya daha asan keçdi və mən ingilis dilini tez öyrəndim.
- Başqa ailədə yaşamaq necədir?
- Əvvəlcə bir az qorxulu və qəribə idi, xüsusən də ilk gün. Amma zamanla öyrəşdim və indi onlar mənim üçün ikinci ailə kimidir. Hələ də onlarla yaşayıram. Məni çox dəstəkləyirlər, oyunlarıma gəlirlər.
Anam üçün, əlbəttə, məndən ayrılmaq çətin idi, amma o da öyrəşdi: bir-birimizin yanına gedirik.
- Bəs ingilis dili bilmədən məktəbdə oxumaq necə idi?
- Burada bu, yaxşı təşkil olunub, çünki ölkədə çoxlu miqrant var. Xüsusi proqramlar var ki, müəllimlər kömək edir və ya tərcüməçidən istifadə etməyə icazə verilir.
- Məktəblə peşəkar futbolu necə uzlaşdırırsınız?
- ABŞ-də hər məktəbin öz futbol komandası var. Əvvəllər həm məktəb liqasında, həm də “LA Serf”də oynayırdım. Bunu uyğunlaşdırmaq çətin deyildi, çünki burada təhsil Rusiyadakı qədər ağır deyil: müəllimlər daha az tələbkardır, yük daha azdır. Məsələn, Rusiyada ildə ondan çox fənnimiz var idisə, burada təxminən yeddidir və hər il dəyişir. İngilis dili və tarix məcburidir, qalanlarını isə özün seçirsən.
Hyustona köçəndən sonra daha da asan oldu, çünki 10-cu sinifdən onlayn təhsilə keçdim, indi isə artıq 12-ci sinifdəyəm. Mənimlə eyni yaşda olan digər oyunçularla hər gün səhər toplaşırıq, iki saat onlayn dərslərlə məşğul oluruq, sonra məşq edir və evə gedirik.
- ABŞ-də onlayn təhsil necədir?
- Müxtəlif müəllimlərim var, amma demək olar ki, ünsiyyət qurmuruq - yalnız köməyə ehtiyacım olanda. Onlar video dərslər, təqdimatlar göndərirlər, sən bunları öyrənirsən və hər dərsin sonunda suallardan ibarət kiçik test olur.
- Məktəbdən sonra ali təhsil almağı planlaşdırırsınız?
- Burada buna çox ciddi yanaşırlar: peşəkar idmançılar mütləq təhsil almalıdır. İki variant var. Ya universitetə daxil olub paralel olaraq universitet liqasında oynayırsan, ya da əsas komanda ilə müqavilə imzalasan, MLS liqası sənə, bildiyimə görə, üç universitet variantı təqdim edir. Onlardan birini seçib onlayn təhsil ala bilərsən. Yəni məktəbdən sonra təhsildən yayınmaq mümkün deyil.
Mən Los-Anceles Kaliforniya Universitetinə(University of California, Los Angeles) idman təqaüdü ilə daxil olmağı və orada pulsuz oxumağı planlaşdırıram. Hələ ixtisas seçməmişəm, amma çox güman ki, humanitar sahə olacaq.
- Azərbaycan kökləriniz barədə danışaq…
- Mənim babam azərbaycanlıdır. Səhv etmirəmsə, o, Bakıda anadan olub, sonra Rusiyaya köçüb. Deyirdi ki, Azərbaycanda çoxlu qohumlarımız var, amma mən onlarla ünsiyyətdə olmamışam və görüşməmişəm, çünki heç vaxt Azərbaycanda olmamışam və dili bilmirəm. Babamın yanına gedəndə o, Azərbaycan haqqında çox danışırdı, Azərbaycan yeməkləri bişirirdi (o, aşpaz işləyib).
- Özünüz Azərbaycan barədə məlumat almağa maraq göstərirdiniz?
- Əlbəttə. Məktəbdə həmişə tarix fənnini sevmişəm, buna görə müxtəlif ölkələrə marağım olub. Babam danışanda həmişə maraqla qulaq asırdım.
- Azərbaycan futbolunu izləyirsiniz?
- Bəli. Xüsusilə “Qarabağ” Çempionlar Liqasında oynayanda izləyirdim. Düşünürəm ki, komanda əsas avrokubokda yaxşı təsir bağışladı. Daha bir neçə Azərbaycan klubunu da tanıyıram.
- Bu yaxınlarda azərbaycanlı futbolçu Nəriman Axundzadə MLS klubuna transfer olub...
- Bəli, məlumatım var. Fürsət olsa, onunla görüşüb ünsiyyət qurmaq istərdim.
- Mediaya sizin Azərbaycan millisində oynamaq istədiyiniz barədə məlumat necə çıxdı? Bu istək nə vaxt yaranıb?
- Mən futbol barədə bir Azərbaycan “Instagram” səhifəsinə abunə oldum, onlar da mənə abunə oldular və Azərbaycana bağlılığım olub-olmadığını soruşdular. Mən hekayəmi danışdım və onlar milli komandada oynamaq istəyim barədə paylaşım etdilər.
Bu doğrudur: belə bir imkan olsa, məmnuniyyətlə razılaşaram. Son bir neçə ayda bu barədə tez-tez düşünürəm. Hazırda Rusiya millisi yaxşı vəziyyətdə deyil. Üstəlik, eşitdiyimə görə, onlar gənclər millisinə xaricdə çıxış edən oyunçuları çağırmırlar. Buna görə ABŞ vətəndaşlığım olmadığı üçün Azərbaycan hazırda yeganə variantımdır.
- Atanız və babanız buna necə yanaşır?
- Onlar məni tam dəstəkləyirlər. Ümumiyyətlə, valideynlərim həmişə mənə kömək edirlər. Onlar üçün əsas odur ki, futbolçu kimi uğur qazanım, əgər üstəlik Azərbaycan millisində də oynasam, bu, ümumiyyətlə ideal olar. Bu baş versə, babam sevincindən tavana qədər tullanar (gülür).
- Tutaq ki, “Qarabağ” sizi görüb Azərbaycan çempionatına dəvət etsə, bu variantı nəzərdən keçirərdiniz?
- Yüz faiz. Məqsədim mümkün qədər tez Avropaya qayıtmaq və orada inkişaf etməkdir. ABŞ-də da səviyyə yaxşıdır, amma Avropada Çempionlar Liqası, Avropa Liqası və tamam fərqli imkanlar var. Üstəlik, Azərbaycandakı qohumlarım adaptasiyada kömək edə bilər. Bununla belə, MLS xoşuma gəlir – güclü liqadır və bura çoxlu yaxşı futbolçular gəlir.
- Klubunuzda rəqabət nə dərəcədə yüksəkdir?
- Bu il əsas komanda çoxlu qapıçı transfer edib, buna görə əsas oyun təcrübəmi akademiyada, U-19 komandasında qazanıram. Amma ötən il “Hyuston Dinamo”nun ikinci komandasında da oynamaq şansım olub. Əlbəttə, hər kəs daha təcrübəli futbolçularla eyni meydanda olmaq istəyir - bu, hər bir oyunçunun arzusudur. Amma qapıçı mövqeyində bu daha çətindir, çünki yalnız bir yer var və rəqabət çox yüksəkdir. Sistemimizdə çoxlu qapıçı var və heyətdə yer uğrunda daim mübarizə aparmaq lazımdır. Mən hər oyuna maksimum ciddi yanaşmağa və 100 faiz gücümü qoymağa çalışıram.
Leyla Eminova
İdman.Biz
Hadisənin gedişatını izləmək üçün ain.az saytında ən son yeniliklərə baxın.
