Son aylarda göyə baxdıqda görünən parlaq işıq izləri təkcə vizual mənzərə yaratmır, həm də elmi dairələrdə müzakirələrə səbəb olur. Hər il fevral ayından etibarən Yer kosmosdakı tozlu və daşlı orbitlərdən keçərkən atmosferə daxil olan meteoritlərin sayı təbii olaraq artır.
HİT.az xəbər verir ki, “Od topu mövsümü” adlanan bu dövr aprelin sonuna qədər davam etsə də, bu il qeydə alınan hadisələr adi səviyyəni aşmış kimi görünür. Xüsusilə Texasda bir evin damına qovun böyüklüyündə daşın düşməsi və Almaniyada oxşar hadisə bu kosmik qonaqların real risk yarada biləcəyini göstərib.
Amerika Meteor Cəmiyyəti tərəfindən yayılan məlumatlara görə, ilin ilk rübündə aktivlik əvvəlki illərlə müqayisədə daha yüksək olub. Bu dövrdə təkcə işıq saçan obyektlər deyil, həm də güclü səs partlayışları (sonik bumlar) daha tez-tez qeydə alınıb. Böyük hadisələrin çoxunda bu səslərin müşahidə olunması atmosferə daxil olan cisimlərin daha iri kütləyə malik ola biləcəyini göstərir.
Tək hadisəni eyni anda yüzlərlə insanın bildirməsi də statistik göstəriciləri artırıb.
Rəqəmlər dəyişib, yoxsa müşahidə qabiliyyətimiz?
Mütəxəssislər bu artımın səbəbi barədə yekdil fikirə gələ bilmirlər. Bir qrup alim həqiqətən kosmosdan gələn axında artım olduğunu düşünür, digərləri isə bunun “insan amilli illüziya” ola biləcəyini deyir.
Onların fikrincə, insanlar artıq bu tip hadisələri daha asan qeyd edir və internet vasitəsilə dərhal rəsmi platformalara bildirirlər. Keçmişdə qeydə alınmayan bir çox hadisə indi statistikaya düşür və bu da artım təsiri yaradır.
NASA isə daha ehtiyatlı mövqe tutur və mövcud məlumatlarda ciddi dəyişiklik görmədiyini bildirir. Qurumun analizlərinə görə, ötən ilin eyni dövründə baş verən bəzi hadisələr əslində daha güclü olub.
Beləliklə, elmi icma iki düşərgəyə bölünüb: biri kosmik zibil axınının dəyişdiyini iddia edir, digəri isə sadəcə müşahidə və raportlaşdırmanın artdığını düşünür. Göydəki bu “sirli trafik” hələ bir müddət həm maraq, həm də narahatlıqla izlənəcək kimi görünür.
Samir
