İsrailin Knesset (parlament) terrorizmdə ittiham olunanlar üçün ölüm hökmünü nəzərdə tutan qanun qəbul edib. Oxuməni.az xəbər verir ki, bu barədə martın 30-da "Yediot Ahronot" xəbər verib. Mübahisəli qanun layihəsinin üçüncü oxunuşunda 62 deputat lehinə, 48 deputat isə əleyhinə səs verib.
Qanun layihəsi milli təhlükəsizlik naziri İtamar Ben-Qvirin ultra-sağçı "Otsma Yehudit" partiyası tərəfindən hazırlanıb. İsrailin baş naziri Benyamin Netanyahu bu təşəbbüsü dəstəkləyib. Məsələ ilə bağlı parlamentdə müzakirələr təxminən 12 saat davam edib.
"The Jerusalem Post" qəzetinin məlumatına görə, qanun terror aktı zamanı qəsdən adam öldürən terrorçunun ölüm hökmünə məhkum edilməsini nəzərdə tutur. Hökm asılma yolu ilə icra ediləcək və edam hökmün çıxarıldığı gündən 90 gün ərzində həyata keçiriləcək.
Qanun layihəsi hakimin qərar qəbul edərkən ölüm hökmü ilə ömürlük həbs arasında seçim edə biləcəyini nəzərdə tutur (sənədin ilk versiyasında yalnız edamdan bəhs edilirdi). Eyni zamanda, İordan çayının qərb sahilində hərbi məhkəmələr tərəfindən terrorizmdə ittiham olunan sakinlər yalnız ölüm hökmünə məhkum ediləcəklər.
"The Times of Israel" qeyd edir ki, qanun faktiki olaraq ölüm hökmünü yalnız fələstinlilər üçün müəyyən edir, çünki İsrail vətəndaşları və ya sakinləri onun təsir dairəsinə açıq şəkildə düşmürlər.
Qanunun ayrıca müddəası məhkəmələrə hər kəsə, o cümlədən İsrail vətəndaşlarına edam hökmü təyin etməyə imkan verir, lakin ölüm hökmü yalnız "İsrail Dövlətinin mövcudluğunu inkar etmək məqsədilə qəsdən adam öldürənlərə" verilə bilər. "The Times of Israel" hesab edir ki, bu tərif israilli terrorçular üçün edamları istisna edir.
Knesset deputatı Gilad Kariv qanuna qarşı Ali Məhkəməyə petisiya ilə müraciət edəcəyini bildirib.
Almaz Həsənli
