Cəmiyyətimizdə qədim dövrlərdən bəri kök salmış və hələ də aktuallığını itirməyən ən maraqlı inanclardan biri gecə saatlarında dırnaq kəsməyin “uğursuzluq” gətirməsi ilə bağlıdır. Xüsusilə yaşlı nəsil tərəfindən ciddi şəkildə qorunan bu qadağa, nəsildən-nəslə ötürülərək müasir dövrə qədər gəlib çıxıb.
Bir çoxları bu hərəkətin evdən bərəkəti qaçırdığına, ailəyə bədbəxtlik gətirdiyinə və ya mistik qüvvələri hərəkətə keçirdiyinə inanır. Lakin tarixə və elmi faktlara nəzər saldıqda, bu inancın kökündə heç bir fövqəltəbii hadisənin deyil, sadəcə keçmişin məişət çətinliklərinin dayandığı aydın olur. Belə ki, elektrik enerjisinin olmadığı qədim dövrlərdə zəif çıraq işığı altında kəsici alətlərlə iş görmək, o cümlədən dırnaq kəsmək ağır fiziki xəsarətlərə və ciddi infeksiyalara yol açırdı. İnsanları bu təhlükədən qorumaq üçün yaranan “gecə dırnaq kəsməzlər” xəbərdarlığı, zaman keçdikcə mifologiyalaşaraq batil inanca çevrilib.
NOCOMMENT.az xəbər verir ki, məsələnin dini mahiyyəti və İslamda bu mövzuya necə yanaşıldığı cəmiyyət üçün ən çox sual doğuran məqamlardan biridir.
Məsələ ilə bağlı dini ekspert Turan İrfan saytımıza açıqlamasında bu cür fikirlərin heç bir dini əsasının olmadığını vurğulayıb:
“İslam dini təmizlik üzərində qurulub və təmizlik hər bir müsəlman üçün günün istənilən saatında vacibdir. Dinimizdə dırnaq kəsmək üçün xüsusi bir zaman məhdudiyyəti qoyulmayıb. Gecə dırnaq kəsməyin uğursuzluq gətirməsi və ya insanın ruzisini kəsməsi barədə nə Qurani-Kərimdə, nə də Peyğəmbərimizin (s.a.s) hədislərində hər hansı bir məlumat yoxdur. Bu, tamamilə uydurulmuş bir xurafatdır”.
Dini ekspert həmçinin qeyd edib ki, bu cür inanclara bağlanmaq insanın mənəviyyatına zərər verə bilər:
“İnsanlar bilməlidir ki, xeyir də, şər də yalnız Allahın əlindədir. Bir dırnaq kəsməklə insanın taleyi dəyişməz və ya uğursuzluq yaranmaz. İslamda təmizlik əməli – istər dırnaq kəsmək, istərsə də digər gigiyenik qaydalar – həm gecə, həm də gündüz yerinə yetirilə bilər. Əsas olan odur ki, insan öz bədən təmizliyinə diqqət yetirsin və ətrafı çirkləndirməsin. Batil inanclarla dini qarışdırmaq cəmiyyətdə yanlış təsəvvürlərin yaranmasına səbəb olur”.
Tunar
NOCOMMENT.az
