Rusiya Prezidenti Vladimir Putin ölkədən 100 qramdan artıq külçə qızılın çıxarılmasını qadağan edib. Putinin təsdiqlədiyi fərman ölkənin rəsmi hüquqi informasiya sistemində dərc olunub.
Qərara əsasən, həm şirkətlərin, həm də fiziki şəxslərin çəkisi 100 qramdan artıq olan külçə qızılı xaricə çıxarması qadağandır.
Rusiyanın qızıl ehtiyatları 2025-ci ilin noyabr ayında ilk dəfə 300 milyard dolları keçib və ölkənin beynəlxalq ehtiyatları içərisində qızılın payı 40 faizdən yuxarı qalxıb.
Bildirilir ki, Moskva Birjası (MOEX) nəzdində fəaliyyət göstərən qiymətli metallar bazarında ümumi əməliyyat həcmi 2025-ci ildə əvvəlki illə müqayisədə üç dəfədən çox artaraq 3 trilyon rublu (təxminən 38 milyard ABŞ dolları) ötüb.
Analitiklərə görə, bu qərar Rusiyanın qızıl ehtiyatlarını ölkə daxilində saxlamaq, maliyyə sabitliyini gücləndirmək, qlobal geosiyasi risklər fonunda strateji ehtiyatları artırmaq məqsədlərinə xidmət edir.
