Zehni sağlamlıq və rifah günün vaxtından birbaşa təsirlənir.
E-saglam.az xəbər verir ki, London Universitet Kollecinin psixoloqları insanların səhərlər özlərini ən xoşbəxt və həyatdan məmnun hiss etdiklərini, narahatlıq, depressiya və tənhalığın isə gecə yarısı ətrafında pik həddə çatdıqlarını müəyyən ediblər.
Tədqiqatda təxminən 50.000 nəfər iştirak edib. İki il ərzində alimlər günün müxtəlif vaxtlarında, həftənin günlərində və fəsillərdə onların psixoloji vəziyyətinin necə dəyişdiyini izləyiblər.
Nəticələr çox aydın idi. Ən aşağı narahatlıq və depressiya səviyyələri səhər saatlarında, ən yüksək xoşbəxtlik, həyatdan məmnunluq və həyatın yaxşı getdiyi hissi ilə birlikdə müşahidə edildi. Gün ərzində əhval-ruhiyyə tədricən aşağı düşdü və gecə yarısı ətrafında bütün göstəricilər ən aşağı səviyyəyə çatdı. Məhz bu zaman özümüzü ən pis hiss edirik - ən tənha, ən narahat və ən bədbəxt.
Alimlər həftəsonları əhval-ruhiyyəmizin fərqli olduğunu müşahidə ediblər. Xoşbəxtlik və həyatdan məmnunluq şənbə və bazar günləri səhərlər yüksəlir, günortaya qədər azalır, axşam yenidən bir qədər yüksəlir və sonra gecə düşəndə yenidən azalır.
Lakin çərşənbə axşamı və çərşənbə səhərləri insanlar digər günlərə nisbətən daha çox depressiyada olurlar. Bu, çox güman ki, həftə ortası iş yükü ilə əlaqədardır.
Amma rifahımıza ən çox təsir edən günün vaxtı deyil, fəsildir. Yay bütün parametrlərdə açıq-aydın qalib olduğunu sübut edib: yayda biz daha xoşbəxt, daha sakit oluruq və özümüzü daha az tənha hiss edirik. Digər tərəfdən, qış zehni sağlamlığımıza ən pis təsir göstərir.
Tədqiqatın nəticələri BMJ Mental Health jurnalında dərc edilib.
Tərcümə: Könül Oruc
E-saglam.az
