“iZombie” və “Supernatural” kimi seriallardakı rolları, eləcə də bir çox filmdəki ikinci dərəcəli obrazları ilə tanınan məşhur aktrisa Carrie Anne Fleming 51 yaşında vəfat edib.
Heftelik.az xəbər verir ki, aktrisa fevralın 26-da dünyasını dəyişib.
Carrie Anne Flemingin qısa müddət əvvəl süd vəzi xərçənginə tutulduğu da onun vəfatından sonra məlum olub.
Fleming aktyorluq fəaliyyətinə ilk olaraq “Viper” serialı və Adam Sandlerin məşhur “Happy Gilmore” filmi ilə başlayıb. O, bu rollardan sonra 30 illik ekran karyerasını uğurla davam etdirib.
Çox sevilən “Supernatural” serialında Jim Beaver-in canlandırdığı Bobby Singer obrazının həyat yoldaşı Karen Singer rolunda beş mövsüm çıxış edən Carrie Anne Flemingin ölümü rol yoldaşı Jim Beaveri dərindən sarsıdıb.
Serialda onun həyat yoldaşını canlandıran Jim Beaver bu ayın əvvəlində Facebook-da paylaşım edərək onların çəkiliş meydançasında necə “şirin şəkildə tanış olduqlarını” və eyni adlı qızlarının olmasının onları necə yaxınlaşdırdığını qeyd edib.
75 yaşlı Beaver ekran partnyoru və real həyatda dostu haqqında “O, çox canlı, mehriban və son dərəcə xoş xasiyyətli idi, şən gülüşü və sevgi dolu enerjisi var idi” sözlərini yazıb.
Fleming-in mətbuat katibi “PEOPLE” jurnalına açıqlamasında bildirib ki, aktrisa Kanadada süd vəzi xərçəngi diaqnozu qoyulduqdan sonra fevralın 26-da vəfat edib: “Sevdiklərinin əhatəsində, sakit şəkildə dünyasını dəyişdi. Carrie-ni tanımaq böyük şərəf idi. O, gözəl ruhlu, ilhamverici və hər şeydən əvvəl çox mehriban insan idi. Onun yoxluğu çox hiss olunacaq.”
Carrie Anne Fleming geridə Madalyn Rose adlı bir qız övladı qoyub. O, “Supergirl”, “UnREAL”, “Motive”, “Continuum”, “Package Deal”, “Alice”, “Knights of Bloodsteel”, “The 4400”, “The L Word” və “Smallville” seriallarında, həmçinin “Happy Gilmore”, “Good Luck Chuck” və “Married Life” kimi filmlərdə rol alıb.
