Yaponiya, atəşkəs əldə olunarsa, Hörmüz boğazında mina təmizləmə əməliyyatlarını nəzərdən keçirə bilər, nazir bildirib.
Reuters in məlumatına görə, Yaponiya, ABŞ və İsrailin İrana qarşı apardığı müharibədə atəşkəs əldə olunacağı təqdirdə, qlobal neft tədarükü üçün həyati əhəmiyyət daşıyan Hörmüz boğazında mina təmizləmə məqsədilə hərbi qüvvələrini yerləşdirməyi nəzərdən keçirə bilər.
Bu barədə xarici işlər naziri Toşimitsu Moteqi bazar günü açıqlama verib.
“Əgər tam bir atəşkəs olarsa, nəzəri olaraq, mina təmizləmə kimi məsələlər gündəmə gələ bilər,” deyə Moteqi Fuji TV kanalında yayımlanan proqramda bildirib.
“Bu, yalnız hipotetik yanaşmadır, lakin əgər atəşkəs təmin olunsa və dəniz minaları maneə yaratsa, bunun nəzərdən keçirilməsi mümkün olar.”
Yaponiyanın hərbi fəaliyyətləri İkinci Dünya müharibəsindən sonrakı pasifist konstitusiyası ilə məhdudlaşdırılıb. Lakin 2015-ci ildə qəbul edilmiş təhlükəsizlik qanunvericiliyi Yaponiyaya, o cümlədən yaxın təhlükəsizlik tərəfdaşına qarşı hücumun ölkənin mövcudluğunu təhdid etdiyi və başqa çıxış yolu olmadığı hallarda, Özünümüdafiə Qüvvələrindən xaricdə istifadə etməyə imkan verir.
Moteqi bildirib ki, Tokio hazırda Hörmüz boğazında qalan Yaponiya gəmilərinin təhlükəsiz keçidini təmin etmək üçün xüsusi razılaşmalar əldə etməyi planlaşdırmır. O əlavə edib ki, dünya üzrə neft daşımalarının beşdə birinin keçdiyi bu dar su yolunda bütün gəmilərin təhlükəsiz hərəkətini təmin edəcək şəraitin yaradılması “son dərəcə vacibdir”.
