"BBC"-nin elm qrupu psixologiya və neyrobiologiya araşdırmalarına əsaslanaraq çətin dövrlərdə zehni dayanıqlılığı artırmağa kömək edə biləcək doqquz üsulu müəyyənləşdiriblər.
Bizim.Media həmin üsulları təqdim edir:
1. Duyğuları dəqiq ifadə etmək
Bu üsullardan birincisi duyğuları daha dəqiq ifadə etməkdir. Araşdırmalar göstərir ki, insanlar hiss etdikləri duyğuları daha konkret şəkildə ifadə etdikdə streslə daha yaxşı mübarizə aparırlar.
“Pisəm” və ya “stresliyəm” demək əvəzinə narahatlıq, məyusluq və ya təşviş kimi daha spesifik ifadələr işlətmək zehni dayanıqlılığı artırır.
2. Narahatlığı motivasiya mənbəyinə çevirin
Narahatlıq çox vaxt mənfi hiss kimi qəbul olunsa da, araşdırmalar onun faydalı tərəfinin də olduğunu göstərir. Orta səviyyədə narahatlıq diqqəti artırır, yaradıcılığı stimullaşdırır və insanı hərəkətə gətirir.
3. Narahatlığı konstruktiv şəkildə yönləndirin
Psixoloqlar narahatlığı boğmaq əvəzinə onu problem həllinə yönəltməyin daha effektiv olduğunu bildirirlər. Bir narahatlığı müəyyən etmək və sonra həll yollarını düşünmək stresi azalda bilər.
4. Kitab və musiqidən faydalanın
Araşdırmalar mütəmadi kitab oxuyan insanların daha az stresli və daha az tənha hiss etdiyini göstərir. Eyni zamanda musiqi də əhval-ruhiyyəni sürətlə dəyişə bilən güclü vasitədir.
5. Ətraf mühitinizi tənzimləyin
Bitkilərlə əhatə olunmuş mühitdə olmaq, təbiət şəkillərinə baxmaq və ya sevdiklərinizin fotolarını görmək belə əhvalınıza müsbət təsir edə bilər.
6. Qorxu filmi izləmək də kömək edə bilər
Araşdırmalar göstərir ki, qorxu filmləri bəzi insanlar üçün streslə mübarizəni asanlaşdıra bilər.
7. Günün yaxşı anlarını yazın
Psixologiyada “üç yaxşı məqam” kimi tanınan bu üsulda insanlar hər axşam gün ərzində yaşadıqları üç müsbət hadisəni qeyd edirlər. Bu sadə vərdiş xoşbəxtlik səviyyəsini artıra bilər.
8. Nəzarət edə bildiklərinizə fokuslanın
Mütəxəssislərin fikrincə, stresin böyük hissəsi nəzarət edə bilmədiyimiz şeyləri dəyişdirməyə çalışmaqdan yaranır.
9. Ümidi hərəkətlə birləşdirin
Psixoloqlar bildirir ki, ümid hissinin ən güclü forması hərəkətə keçməklə yaranır. Sadəcə yaxşı şeylərin baş verməsini gözləmək əvəzinə, kiçik addımlar atmaq gələcəyə daha nikbin baxmağa kömək edir.
Bizim.Media
