İran və Ukrayna cəbhələrində ucuz dron-kamikadzelərin əsas təhlükəyə çevrildiyi bir vaxtda, Pentaqon bu problemin “sehrli həllini” tapıb. İsrail kəşfiyyatına yaxın mənbələrdən əldə edilən məlumatlara görə, ABŞ hərbçiləri onlarla pilotsuz uçuş aparatını (PUA) bir neçə saniyə ərzində sıradan çıxarmağa qadir olan yüksək güclü mikrodalğalı silahın (HPM) uğurlu sınaqlarını keçiriblər. Sınaqların nəticələri kifayət qədər təsiredicidir: yeni sistem cəmi bir atəşlə 61 hədəf-drondan 49-nu anında zərərsizləşdirib.
NOCOMMENT.az xəbər verir ki, bu texnologiya sadəcə yeni bir silah növü deyil, müasir müdafiə sistemlərində paradiqmanın tamamilə dəyişməsi deməkdir. Raket və ya mərmilərə əsaslanan klassik Hava Hücumundan Müdafiə (HHM) sistemlərindən fərqli olaraq, bu qurğu yönləndirilmiş elektromaqnit impulslarından istifadə edir. İş prinsipi dronun “sinir sistemini” yandırmağa bənzəyir: güclü impuls aparatın gövdəsinə nüfuz edərək onun elektron sxemlərində həddindən artıq gərginlik yaradır. Nəticədə naviqasiya (GPS), rabitə və mühərrik kontrollerləri sıradan çıxır, “beyni” dumanlanan dron hədəfə çatmadan yerə çırpılır.
Ekspertlər mikrodalğalı silahların (DEW) gələcək müharibələrdə dörd əsas üstünlüyünü vurğulayırlar: sonsuz sursat ehtiyatı (generator işlədiyi müddətcə atəş açmaq mümkündür), bir atəşin dəyərinin cəmi bir neçə sent olması, “dron sürülərini” bütöv bir sektor üzrə eyni anda məhv etmək qabiliyyəti və mülki əhali üçün minimum risk (partlayış qəlpələrinin olmaması).
Analitiklər əmindirlər ki, bu sistemlər aeroportlar, elektrik stansiyaları və komanda məntəqələri kimi strateji obyektlər üçün yeni “Dəmir Qübbə” rolunu oynayacaq. Artıq ucuz dronların döyüş meydanında cəzasız şəkildə şərt diktə etdiyi dövr başa çatır. ABŞ-ın təmiz fizikaya əsaslanan bu addımı, kütləvi dron hücumlarını həm mənasız, həm də təcavüzkar tərəf üçün hədsiz baha başa gələn bir taktika halına gətirir.
Sara,
NOCOMMENT.az
