ain.az bildirir, Demokrat.az saytına əsaslanaraq.
Bakıda park və digər ictimai məkanların yenidən qurulması və abadlaşdırılması şəhərin estetik görünüşünü yaxşılaşdırmaqla yanaşı, daşınmaz əmlak bazarına da təsir göstərir. Belə layihələr ətrafındakı ərazilərin daha cəlbedici olmasına və yaşayış üçün əlverişli mühitin formalaşmasına səbəb olur. Abadlaşdırılan məkanların yaxınlığında mənzil qiymətləri yüksələ bilər, həm alıcı, həm də kirayə bazarında tələbat arta bilər.Məsələ ilə bağlı Demokrat.az-a açıqlama verən daşınmaz əmlak məsələləri üzrə ekspert Elnur Azadov bildirib ki, hər hansı bir daşınmaz əmlakın park yaxınlığında və ya qonşuluğunda yerləşməsi onun qiymət və orientir baxımından digərlərindən fərqlənməsinə ciddi üstünlük verir."Parkların varlığı həm ərazinin estetik görünüşünü artırır, həm də sakinlər üçün istirahət zonası rolunu oynayır. Bu səbəbdən belə əmlaklar digər binalara nisbətən daha cəlbedici və seçilən olur. Daşınmaz əmlakın təmir vəziyyəti müvəqqəti xarakter daşıyır. Yəni müəyyən dövrdə təmir işləri aparıla bilər, bu isə qiymətə yalnız qısa müddətli təsir göstərə bilər. Lakin əsaslı yenidənqurma və ya təmir işləri aparıldıqda, bu, əmlakın bazar qiymətinə uzunmüddətli müsbət təsir göstərir".Ekspert əlavə edib ki, park yaxınlığı xüsusilə Bakı şəhərində mühüm üstünlük sayılır."Çünki paytaxtda yaşıllıq zonalarının çatışmazlığı müşahidə olunur. Evlərin park, yaşıllıq sahəsi və açıq hava ilə qonşuluğu həm yaşayış keyfiyyətini artırır, həm də daşınmaz əmlakın bazar dəyərinə müsbət təsir göstərir. Beləliklə, park və ya yaşıl ərazilərin yaxınlığında yerləşən əmlaklar həm vizual, həm də funksional üstünlüklərə malik olur və bazarda rəqabət qabiliyyətini yüksəldir".Əfsanə Kamal
Demokrat.az
Daha ətraflı məlumat və yeniliklər üçün ain.az saytını izləyin.
