İranın ali dini lideri Müctəba Hüseyni Xamenei İranın Ali Milli Təhlükəsizlik Şurasının katibi Əli Laricani və onun oğlunun ölümü ilə bağlı başsağlığı mesajı yayıb.
Musavat.com xəbər verir ki, onun bəyanatı “Rəhman və Rəhim olan Allahın adı ilə” sözləri ilə başlayır və Qurandan sitatla davam edir:
“Allah yolunda öldürülənləri ölü hesab etməyin, əksinə, onlar Rəbbləri tərəfindən dirildiləcək və ruzi veriləcəklər”.
Xamenei mesajında Əli Laricaninin fəaliyyətinə toxunaraq onu “müxtəlif siyasi, hərbi, təhlükəsizlik, mədəni və idarəetmə sahələrində təcrübəyə malik alim, uzaqgörən, müdrük və sadiq şəxs” kimi xarakterizə edib. O qeyd edib ki, Laricaninin onilliklər boyu dövlət sistemində fəaliyyəti onu “görkəmli şəxsiyyətə çevirmişdi”.
Bəyanatda hadisəyə sərt münasibət də ifadə olunub. Xamenei bildirib:
“Şübhəsiz ki, belə bir şəxsiyyətin terroru onun əhəmiyyətinin dərəcəsini və İslam düşmənlərinin ona qarşı nifrətini göstərir”.
Mesajın sonunda isə diqqətçəkən xəbərdarlıq yer alıb:
“İslam əleyhdarları bilməlidirlər ki, İslam nizamının ağacının ətəyində bu qanı tökmək onu daha da gücləndirir və əlbəttə ki, hər bir qanın bədəli var və şəhidlərin cinayətkar qatilləri tezliklə ödəməli olacaqlar”.
Xamenei mərhumun ailəsinə, o cümlədən həyat yoldaşına, övladlarına və yaxınlarına, xüsusilə ayətullah Amoli Laricaniyə başsağlığı verib və onlar üçün səbir diləyib.
Musavat.com
