İran müharibənin dağıdıcı təsirləri və İkinci Dünya müharibəsindən bu yana qeydə alınan ən yüksək inflyasiya göstəriciləri ilə sarsıldığı bir dövrdə, hakimiyyət ictimai narazılığı azaltmaq məqsədilə minimum əməkhaqqını 60 faiz artırmaq qərarı verib. Artım faizi ölkə əhalisi arasında təəccüb doğurub.
"Cebheinfo.az" xəbər verir ki, İranın Əmək naziri Əhməd Meydarinin bazar ertəsi təsdiqlədiyi qərara əsasən, aylıq minimum əməkhaqqı 103 milyon rialdan (təxminən 67,5 avro) 166 milyon riala (109 avro) yüksəldilib.
İran rialının ABŞ dolları qarşısında 1,35 milyon səviyyəsinə qədər ucuzlaşması əhalinin alıcılıq qabiliyyətini demək olar ki, tamamilə zəiflədib.
Fevral ayının məlumatlarına görə, ölkədə inflyasiya rəsmi mənbələr tərəfindən 62–68 faiz aralığında açıqlanıb və bu göstərici müasir İran tarixində ən ağır iqtisadi vəziyyət kimi qeydə alınıb.
Aylıq inflyasiyanın 9,4 faizə qədər yüksəlməsi isə 2022-ci ildən bəri həyata keçirilən islahat cəhdlərindən sonra müşahidə olunan ən kəskin artım hesab olunur.
