Rusiya Prezident Administrasiyası rəhbərinin birinci müavini Sergey Kiriyenko Ukraynanın Donetsk vilayətində yerləşən Dimitrov qəsəbəsində görüntülənib.
Musavat.com xəbər verir ki, bu barədə Kremlin təbliğat xəttinə yaxınlığı ilə tanınan "Solovyov kanalı" video reportaj və müşayiətedici mətn yayıb.
Yayılan məlumatlara görə, Kiriyenko Rusiya tərəfindən “azad edilmiş” kimi təqdim olunan Dimitrovda yerli sakinlərlə görüş keçirib, onların problemlərini dinləyib və sosial məsələlərin həlli ilə bağlı göstərişlər verib. Bildirilir ki, qəsəbədə hələ də mülki əhali qalır və onlara humanitar yardım göstərilir.
Rəsmi mətnə əsasən, səfər çərçivəsində Kiriyenko Rusiya ordusunun müxtəlif hərbi birləşmələrinin şəxsi heyəti ilə də görüşüb. Xüsusilə, özünü qondarma “DNR” rəhbərliyi ilə əlaqələndirən 5-ci qvardiya motoatıcı briqadası və 24-cü xüsusi təyinatlı briqadanın hərbçilərinə dövlət mükafatlarının təqdim edildiyi vurğulanır. Bu hərbi hissələrin Donetsk istiqamətində aktiv əməliyyatlar apardığı iddia olunur.
Eyni zamanda, yayımlanan görüntülərdə dağıdılmış yaşayış binaları, infrastrukturun ciddi zədələnməsi və müharibənin ağır izləri açıq şəkildə əks olunur. Bu da regionda vəziyyətin nə qədər gərgin və dağıdıcı olduğunu göstərir.
Qeyd edək ki, beynəlxalq hüquqa görə, sözügedən ərazilər Ukraynanın suveren torpaqları hesab olunur və Rusiyanın bu bölgələrdəki fəaliyyəti işğal kimi qiymətləndirilir. Buna baxmayaraq, Moskva informasiya müstəvisində bu cür səfərlərlə həm daxili auditoriyaya, həm də beynəlxalq ictimaiyyətə fərqli mesajlar ötürməyə çalışır.
Musavat.com yazarına görə, Kiriyenkonun məhz ön xəttə yaxın ərazilərdə görüntülənməsi təsadüfi deyil. Bu addım, bir tərəfdən Rusiya ordusunun irəlilədiyi görüntüsünü yaratmağa xidmət edir, digər tərəfdən isə mülki idarəetmənin qurulduğu barədə təbliğat xəttini gücləndirir.
Azərbaycanın sabiq xarici işlər naziri Tofiq Zülfüqarovun əvvəlki təhlillərində də qeyd olunduğu kimi, Kiriyenko Kremlin ideoloji və siyasi proseslərinin əsas kuratorlarından biri hesab olunur. Onun postsovet məkanında, o cümlədən Azərbaycan və diaspor məsələlərində müxtəlif informasiya və təsir kampaniyalarında rol oynadığı iddiaları da mövcuddur.
Beləliklə, Dimitrovda baş verən bu səfər yalnız lokal hadisə deyil, daha geniş – informasiya müharibəsinin tərkib hissəsi kimi qiymətləndirilir. Bu tip görüntülər vasitəsilə Kreml həm hərbi uğur görüntüsü yaradır, həm də işğal olunmuş ərazilərdə “idarəetmə və sabitlik” mesajı verməyə çalışır.
Musavat.com
