BAKI, 12 mart. TELEQRAF
Çeçenistan rəhbəri Ramzan Kadırov ABŞ və İsraili İrana qarşı hücumla islam dünyasını parçalamağa cəhd göstərməkdə ittiham edib.
Teleqraf xəbər verir ki, Kadırov bildirib ki, ABŞ və İsrailin müqəddəs Ramazan ayında İrana qarşı həyata keçirdiyi hücum islam dünyasında parçalanma yaratmağa yönəlib.
“Ramazan ayında İrana qarşı xain hücum həyata keçirən ABŞ və İsrail bütün islam dünyasına parçalanma salmağa cəhd edib. Aqressorlar qəsdən İranı cavab addımlarına təhrik ediblər və bu addımlar münaqişəyə üçüncü ölkələrin də cəlb olunmasına səbəb olur”, - deyə o, Telegram kanalında yazıb.
Çeçenistan rəhbəri İranın ABŞ hərbi bazalarına cavab zərbəsini gözlənilən adlandırsa da, üçüncü ölkələrin mülki infrastrukturuna hücumları və dinc əhalinin həlak olmasını yolverilməz hesab etdiyini bildirib.
Kadırov əlavə edib ki, hazırkı vəziyyətdə Fars körfəzi ölkələrinin fəaliyyətlərini daha sıx əlaqələndirməsi vacibdir. Onun sözlərinə görə, ilin əvvəlində Səudiyyə Ərəbistanı, Qətər, Bəhreyn və bir sıra digər ölkələrin səfirləri geniş görüş keçirilməsi təklifi ilə ona müraciət ediblər.
Lakin o qeyd edib ki, görüşdə Birləşmiş Ərəb Əmirliklərinin səfiri iştirak etmədiyi üçün formatın genişləndirilməsi və bu ölkənin nümayəndəsinin də qatılması şərti ilə görüş təxirə salınıb.
Kadırov vurğulayıb ki, region ölkələri dialoq imkanlarını qoruyub saxlamalı və xarici qüvvələrin düşmənçilik yaratmaq cəhdlərinə qarşı birgə mövqe nümayiş etdirməlidir.
