Bugünlərdə karyerasını başa vurduğu məlum olan Türkiyənin tanınmış hakimlərindən Arda Kardeşler doğulduğu Bursa şəhərində işıq üzü görən “Spor Bursa” nəşrinə açıqlamalar verib.
"Football-plus.az" xatırladır ki, 38 yaşlı ədalət təmsilçisi sentyabrda keçirilən “Trabzonspor” – “Qaziantep” oyununda (1:1) kobud səhvlə gündəmə gəlmişdi. “Trabzonspor” boş zona yaxalayaraq hücuma çıxarkən oyunu dayandırmaqla o, bir andaca nifrət obyektinə çevrilmişdi. Arda Kardeşler 2015-ci ildən elita matçlarına təyinat alırdı və superliqada 100-dən çox oyun idarə etmişdi. Sözü verək ona.
* Trabzondakı matçda yaşanan epizodda fitimi səsləndirdikdən sonra oyunçuya topu hələ oyuna daxil etməməyi göstəriş verdim. O isə topu oyuna daxil etdi. Mən də bu üzdən oyunu saxlayaraq “gözlə” dedim. Əslində belə epizodlar bir çox matçlarda yaşanır. Sadəcə, “üstünlük” prinsipinin itməsi üzündən olay tam fərqli yerlərə yozuldu. Bu hadisənin böyük təsiri oldu. Açığı, mən də həmin an epizodu izləsəydim, “Trabzonspor”un “üstünlük” prinsipini itirdiyini düşünərdim. Çünki hücum başlayarkən topu qəbul edən futbolçunun önü çox açıq idi.
* Federasiya prezidenti zatən həmin gün canlı yayında deyəcəklərininin hamısı dedi (İbrahim Hacıosmanoğlu “bunun qarşılığı çox ağır olacaq” demişdi – red.). Onun bu sözündən sonra mənim artıq Türkiyədə hakimlik etməyim mümkün deyildi. Zatən o gündən sonra da bir daha hakim kimi fəaliyyət göstərmədim. Yanvarda istefa məktubumu göndərdim. Bu, sadəcə, prosedurun tələbi idi. İşin hüquqi tərəfidi. İstefam qəbul olundu və hər şey bitdi. İntizam Komtiəsinin mənə verdiyi 15 günlük cəzanın isə həmin oyunla əlaqəsi yox idi. Hakimlər Komitəsinin icazəsi olmadan televiziyaya çıxdığıma görə cəzalandım.
* Təxminən 10 il bu işi böyük məmnuniyyətlə yerinə yetirdim. Amma son 2-3 mövsümdə performansım o qədər mükəmməl deyildi. Açığı, mənə artıq önəmli qarşılaşmalar həvalə edilmirdi. Görünür, qismətim bura qədər imiş.
* Karyeram boyunca mənə nə vaxtsa pul təklif olunubmu? Bəli, bir dəfə olub. Zatən həmin hadisə ilə bağlı bütün dosyelər indiyə qədər də federasiyadadı. Çünki belə bir olayın iştirakçısı olan kimi dərhal polisə gedərək ifadə verdim. Hadisə mənim idarə etdiyim oyunda yaşanmamışdı. Sadəcə, mənim vasitəmlə başqa bir hakimə pul təklif etmək istəmişdilər.
* VAR böyük qalmaqalların və kobud səhvlərin qarşısını kəsmək üçün yaradılıb. Düzdü, xəttin çəkilməsi ilə ofsayd mövzusunda, demək olar, problem aradan qaldırıldı. Amma penalti və əllə oyun kimi mübahisəli məqamlarla bağlı dünyanın hər yerində müzakirələr davam edir. Hər halda, ən azı aşkar əllə oyun olduqda bu, gözdən qaçmır. İllər öncə “Vanspor”la oyunda “Beşiktaş”lıların indiyə qədər də unuda bilmədiyi bir əllə oyun epizodu yaşanmışdı. Artıq o cür epizodlar yaşanmır.
* Bundan sonra menecerliklə məşğul olmağı planlaşdırıram. Lisenziya almaq və FİFA meneceri olmaq istəyirəm. Aprelin sonunda keçiriləcək imtahanlara hazırlaşıram. Cənubi Mərmərə bölgəsində çox istedadlı futbolçular yetişir. Onların inkişafına dəstək olmaq və düzgün klublara yönəltmək istəyirəm. Hər halda, illərdi futbolun içindəyəm. Bu sahədə bir çox tanışım var. Həm bundan, həm də futbolçunun potensialını üzə çıxarmaq qabiliyyətimdən yararlanmaq niyyətindəyəm.
* Efirlərə çıxıb şərhçi kimi heç vaxt işləmərəm! Birincisi, o hakimlərin çoxu mənim qardaşlarımdı. Uzun illər birlikdə çalışmışıq. Onları efirdə tənqid etməyim etik cəhətdən düzgün olmaz. İkincisi, onsuz da ölkədə şərhçilərin sayı çoxdu. 90 dəqiqəlik oyunu az qala üç saat şərh edirlər. Bəzən reytinq xətrinə efirdə etik normalara uyğun olmayan sözlər işlədirlər. Məsələn, Mustafa Çulcu uzun illər HK sədri kimi çalışıb. Üzərimizdə əməyi çox olub. Amma indi efirdə hakimləri tənqid edir. Şərhçilik mənə uyğun iş deyil.
* Məncə, Türkiyədə hakimlik insanların və mətbuatın iddia etdiyi qədər bərbad durumda deyil. Superliqada oyunların pis idarə olunduğunu düşünmürəm. Digər ölkələri də izləyirik. Hakim səhvləri İspaniyada da, İngiltərədə də olur. Düzdü, bizim hakimlərin ümumi idarəçiliyi yox, amma bəzi qərarları çox bərbad olur. Hərçənd dediyim kimi elə bir ölkə yoxdu ki, orda hakimlikdə səhv olmasın. Hətta deyərdim, bizdəki hakimlik bir çox ölkədəkindən üstündü. İşin maddi tərəfi də ildən-ilə yaxşılaşır. Hakimlər indi yaxşı qazanır. Adamların bu sahəyə maraq göstərməsinin bir səbəbi də budu.
