ABŞ Müdafiə Nazirliyi İrana qarşı əməliyyat zamanı sərf olunan raket ehtiyatlarını bərpa etmək üçün Konqresə əlavə maliyyə sorğusu göndərməyi planlaşdırır.
AFN.az xəbər verir ki, bu barədə "The Wall Street Journal" (WSJ) qəzeti məlumat yayıb.
Nəşrin məlumatına görə, həm qanunvericilər, həm də ABŞ-ın müdafiə sənayesi nümayəndələri Pentaqondan əlavə maliyyələşdirmə ilə bağlı sorğu gözləyirlər. Vəsaitlər ABŞ-İsrail əməliyyatının başlanğıcından bəri fəal şəkildə istifadə olunan "Patriot", "Tomahawk" və "THAAD" sistemləri üçün raketlərin satın alınmasına yönəldilməlidir.
Nəşr qeyd edir ki, ABŞ hərbçiləri 2025-ci ildən bəri müdafiə podratçılarından raket istehsalının sürətləndirilməsini tələb edirlər, lakin istehsalçılar bunun bir çox hallarda subpodratçılardan və tədarük zəncirlərindən asılı olduğunu bildiriblər.
Pentaqonun keçmiş əməkdaşı Eleyn Makkaskerin təhlilinə əsasən, hərbi əməliyyatların ilk dörd günü ABŞ-a təxminən 11 milyard dollara başa gəlib. Onun hesablamalarına görə, bu məbləğin təqribən 5,7 milyard dolları yalnız tutucu raketlərin tətbiqi ilə bağlıdır.
