Eltun Süleymanov: "8 Mart zərifliyin gücü, ləyaqətin zirvəsidir"
Tarix bəzən qılıncla yazılır, bəzən qələmlə. Azərbaycan tarixinin isə ən möhkəm səhifələri ana laylası, qadın müdrikliyi və zərif, lakin sarsılmaz iradə ilə yazılıb. 8 Mart – Beynəlxalq Qadınlar Günü yalnız təbrik və gül-çiçək günü deyil. Bu tarix Azərbaycan qadınının keçdiyi yolun, qazandığı nailiyyətlərin, cəmiyyətə bəxş etdiyi mənəvi gücün hesabat günüdür. Çünki Azərbaycan qadını sadəcə ailənin deyil, dövlətin, millətin, gələcəyin dayağıdır.
Bu sözləri aia.az-a açıqlamasında Eltun Süleymanov deyib.
Müsahibimiz onu da deyib ki, Azərbaycan qadını tarix boyu sədaqət və cəsarətin simvolu olub. Xalqımızın qədim dastanı Kitabi-Dədə Qorqud qadın igidliyini və vətənpərvərliyini poetik dillə təsvir edir. Orta əsrlərdə Sara Xatun diplomatik məharəti ilə dövlətlərarası münasibətlərdə mühüm rol oynayıb, Möminə Xatun siyasi iradə və dövlətçilik ənənələrinin qorunmasında əvəzsiz xidmət göstərib. Türk dünyasının qəhrəman qadın hökmdarı Tomris isə tarixdə qadın liderliyinin ən möhtəşəm simalarından biri kimi qalır. Bu irs Azərbaycan qadınının taleyində yalnız keçmiş deyil, həm də bu günün güc mənbəyidir. 1918-ci ildə yaradılmış Azərbaycan Xalq Cümhuriyyəti qadınlara seçib-seçilmək hüququ verən ilk müsəlman dövləti kimi tarixə düşdü. Bu, təkcə hüquqi qərar deyildi. Bu, qadına verilən etimad, onun zəkasına və ictimai mövqeyinə göstərilən hörmət idi. Azərbaycan qadını bir çox Avropa ölkələrindən əvvəl siyasi səhnəyə çıxdı və dövlət quruculuğunda söz sahibinə çevrildi.
Müstəqil Azərbaycan mərhələsində qadın siyasətinin sistemli əsaslarla qurulması Ümummilli lider Heydər Əliyev adı ilə bağlıdır. Ulu Öndər qadınların ictimai-siyasi həyatda rolunu gücləndirdi, onların rəhbər strukturlarda təmsilçiliyini prioritet məsələ kimi müəyyənləşdirdi. Onun təşəbbüsü ilə keçirilən qadın qurultayları, qəbul edilən fərman və sərəncamlar dövlət qadın siyasətinin möhkəm təməlini formalaşdırdı. Bu siyasət bu gün cənab Prezident İlham Əliyev tərəfindən müasir çağırışlara uyğun şəkildə davam etdirilir. Gender bərabərliyi sahəsində qəbul olunan qanunlar, 2006-cı il tarixli “Gender (kişi və qadınların) bərabərliyinin təminatları haqqında” və 2010-cu il tarixli “Məişət zorakılığının qarşısının alınması haqqında” qanunlar hüquqi müstəvidə yeni mərhələ açdı. Eyni zamanda Azərbaycan Respublikasının Ailə, Qadın və Uşaq Problemləri üzrə Dövlət Komitəsi ailə və gender siyasətinin koordinasiyasında mühüm rol oynayır. Azərbaycan Respublikasının Birinci vitse-prezidenti Mehriban xanım Əliyeva ölkəmizin humanitar diplomatiyasının əsas simalarındandır. Onun rəhbərlik etdiyi Heydər Əliyev Fondu vasitəsilə həyata keçirilən sosial, mədəni və xeyriyyə layihələri Azərbaycanın beynəlxalq nüfuzunu artırır, milli-mənəvi dəyərlərimizi dünyaya tanıdır. Mehriban xanım Əliyevanın fəaliyyəti Azərbaycan qadınının həm zərif, həm də strateji düşüncəyə malik lider obrazını nümayiş etdirir. Rəqəmlərin dili ilə desəm bu gün ölkə əhalisinin 50,2 faizini qadınlar təşkil edir. İşçi qüvvəsində onların payı 48 faizdən artıqdır. Yerli özünüidarəetmə orqanlarında qadınların təmsilçiliyi son illərdə kəskin artaraq 39 faizdən çoxa çatıb. Milli Məclisdə qadın deputatların sayı artan dinamika nümayiş etdirir və artıq parlamentə qadın sədr rəhbərlik edir. Qadınlar dövlət qulluğunda, məhkəmə və hüquq-mühafizə sistemində, sahibkarlıq və elm sahələrində uğurla təmsil olunurlar. “Azərbaycan Respublikasında gender (kişi və qadınların) bərabərliyi üzrə 2026–2028-ci illər üçün Milli Fəaliyyət Planı” qadınların ictimai fəallığının artırılması, rəqəmsal savadlılığın gücləndirilməsi, əmək bazarında gender fərqlərinin azaldılması və media mühitində gender mədəniyyətinin təşviqi kimi strateji istiqamətləri müəyyən edir. Bu sənəd yalnız hüquqi çərçivə deyil, həm də cəmiyyətin düşüncə tərzinin yenilənməsinə yönəlmiş konseptual proqramdır.
Azərbaycan qadını bu gün elm auditoriyalarında, əməliyyat otaqlarında, parlament tribunasında, sahibkarlıq platformalarında, hərbi hissələrdə və ailə ocağında eyni məsuliyyətlə çıxış edir. O, həm ana kimi müqəddəsdir, həm lider kimi prinsipial, həm vətəndaş kimi fəaldır. 8 Mart münasibətilə söylənilən hər bir təbrik, əslində, Azərbaycan qadınının zəhmətinə və sədaqətinə verilən dəyərin ifadəsidir. Çünki güclü dövlət yalnız iqtisadi göstəricilərlə deyil, qadınının ləyaqəti və cəmiyyətdə tutduğu mövqe ilə ölçülür. Azərbaycan qadını dünənin qəhrəmanı, bu günün aparıcı qüvvəsi və sabahın ümididir-deyə E. Süleymanov fikirlərini tamamlayıb.
