Yeni araşdırmalar göstərir ki, mahnı oxumaq immun sisteminə qısa müddətdə müsbət təsir göstərə bilər.
“Yeni Sabah” bu barədə bir sıra məlumatları bir yerə toplayıb.
Alimlərin məlumatına görə, cəmi bir saat aktiv şəkildə mahnı oxumaq bəzi qoruyucu anticisimlərin səviyyəsini xeyli artırır.
Tədqiqatlarda əsas diqqət İmmunqlobulin A (sIgA) adlı anticismə yönəlib. Bu maddə ağız, boğaz və həzm sistemini infeksiyalardan qorumaqda mühüm rol oynayır. Müxtəlif xor kollektivləri üzərində aparılan müşahidələr göstərib ki, aktiv şəkildə mahnı oxuyan şəxslərdə sIgA səviyyəsi bir saat ərzində əhəmiyyətli dərəcədə, bəzi hallarda 200 faizdən çox arta bilir.
Mütəxəssislər vurğulayırlar ki, burada əsas şərt aktiv iştirakdır. Sadəcə musiqi dinləmək emosional rahatlıq versə də, immun sistemində eyni səviyyədə sürətli dəyişiklik yaratmır. Səsi istifadə etmək və mahnını ifa etmək daha güclü təsir göstərir.
Araşdırmalar həmçinin göstərir ki, mahnı oxumaq bədəndə sakitləşdirici təsir yaradır. Bu zaman vagus siniri aktivləşir, əsas stres hormonu olan kortizolun səviyyəsi azalır və immun cavab tarazlaşır.
Maraqlıdır ki, müsbət nəticələr təkcə peşəkar müğənnilərdə deyil, adi insanlarda, eləcə də ciddi xəstəliklərlə mübarizə aparan şəxslərdə və onlara qulluq edən insanlarda da müşahidə edilib. Alimlər hesab edirlər ki, xüsusi musiqi təhsili olmasa belə, sadəcə mahnı oxumaq sağlamlığı dəstəkləyən sadə və əlçatan vasitədir.
Nazim Hacıyev
Telegram kanalımız
