BAKI, 27 fevral. TELEQRAF
Tip 1 şəkərli diabet xəstələri üçün tibbi ləvazimatların aylıq normasının artırılması və lisenziyasız tibbi xidmətlərə nəzarətin gücləndirilməsi təklif edilir.
Teleqraf xəbər verir ki, bu barədə Ombudsman Aparatının rəhbəri Aydın Səfixanlı fevralın 27-də Milli Məclisin İnsan hüquqları komitəsinin iclasında bildirib.
İclasda əhalinin sağlamlıq hüququnun qorunması məqsədilə Tip 1 şəkərli diabet xəstələri üçün vizual test çubuqlarının aylıq normasının 150 ədədə çatdırılması təklif olunub.
Həmçinin qeyd edilib ki, kənd yerlərindəki tibb müəssisələrinə kadrların cəlb olunması üçün nəzərdə tutulan maliyyə təminatları sosial-iqtisadi tələblərə uyğun yenidən nəzərdən keçirilməlidir.
Eyni zamanda, lisenziyasız və qeyri-ixtisaslı şəxslər tərəfindən göstərilən xüsusilə stomatoloji və plastik cərrahiyyə xidmətlərinin qarşısının alınması üçün nəzarət tədbirlərinin gücləndirilməsi zəruri hesab edilib.
Təkliflər həmçinin həssas qruplar – uşaqlar, ahıllar və əlilliyi olan şəxslər üçün evdə tibbi xidmət və dərman təminatının genişləndirilməsini əhatə edir.
