The Wall Street Journal (WSJ) qəzetinin məlumatına görə, İran Cenevrə danışıqlarında ABŞ-ın bütün tələblərini rədd edib. Nəşrin məlumatına görə, danışıqlar uranın xaricə daşınması ilə bağlı olub. İran uranın zənginləşdirilməsini dayandırmaqdan, nüvə obyektlərini sökməkdən və ya nüvə proqramının inkişafına qeyri-müəyyən məhdudiyyətlər qoymaqdan imtina edib.
26 fevralda İsveçrə şəhərində Omanın vasitəçiliyi ilə İran və ABŞ arasında İranın nüvə proqramı üzrə dolayı danışıqların üçüncü raundu başlayıb. Lakin görüş nümayəndə heyətləri və onların müvafiq hökumətləri arasında məsləhətləşmələr üçün dayandırılıb.
Axios jurnalisti Barak Ravidin sözlərinə görə, ABŞ prezidentinin xüsusi elçisi Stiv Vitkov və amerikalı sahibkar Cared Kuşner İranla səhər danışıqlarından məyus olublar.
Danışıqlar həmin axşam davam edib. Siyasətçilər Cenevrədə Oman xarici işlər nazirinin iqamətgahında görüşüblər. Bundan əvvəl İran prezidenti nüvə silahı ilə bağlı heç bir planının olmadığını təsdiqləmişdi.
Əziz MUSTAFA
