Kristiano Ronaldo bu klubun səhmlərinin 25 faizini aldı

Portuqaliya millisinin və “Əl-Nəsr”in hücumçusu Kristiano Ronaldo İspaniyanın “Almeriya” klubunun səhmlərinin 25 faizini alıb.

Arena.az xəbər verir ki, bu barədə sözügedən klub rəsmi saytı vasitəsilə məlumat yayıb.

Rəsmi açıqlamada bunlar qeyd edilib:

“Kristiano Ronaldo, CR7 S.A.-nın törəmə şirkəti olan CR7 Sports Investments vasitəsilə “Almeriya”da 25 faiz pay əldə edib və bu, həm klubun, həm də portuqaliyalı iş adamının investisiya portfelinin davamlı genişlənməsində əhəmiyyətli bir addımdır.

Bu müqavilə, klubun prezidenti Məhəmməd Əl-Xeriji tərəfindən öz biznes konqlomeratı olan “SMC Group” vasitəsilə həyata keçirilən beynəlxalq genişlənmənin bir hissəsidir.

“Almeriya”nın prezidenti Məhəmməd Əl Xeriji bildirib: “Kristianonun investisiya qoymaq üçün klubumuzu seçməsindən məmnunuq. O, bütün dövrlərin ən böyük oyunçusu hesab olunur, İspan futbolunu çox yaxşı bilir və burada həm əsas komanda, həm də gənclər akademiyası baxımından qurduğumuz şeylərin potensialını başa düşür”.

Kristiano Ronaldo öz növbəsində bildirib: “Uzun müddətdir ki, məqsədim meydandan kənarda futbola töhfə vermək olub. “Almeriya” möhkəm təmələ və aydın böyümə potensialına malik bir klubdur. Klubun növbəti böyümə mərhələsini dəstəkləmək üçün rəhbərliklə birlikdə işləməyi səbirsizliklə gözləyirəm”.