"American Airlines" aviaşirkəti Kolumbiyada olan təyyarələrindən birinin gövdəsində dəlik aşkar edildikdən sonra həmin hava gəmisini istismardan çıxardığını açıqlayıb.
AFN.az xəbər verir ki, məsələ ilə bağlı məlumatı olan mənbə sözügedən dəliyin güllə izi olduğunu bildirib.
Aviaşirkətdən verilən məlumata görə, zədə bazar günü Medellin şəhərində keçirilən rutin yoxlama zamanı aşkar olunub. Hadisə nəticəsində hər hansı xəsarət alanın olmadığı və uçuş təhlükəsizliyinə təsir edən bir problemin qeydə alınmadığı bildirilib.
Şirkət rəsmiləri təyyarənin ətraflı yoxlanılması və təmiri üçün dərhal reyslərdən kənarlaşdırıldığını elan ediblər. Açıqlamada bu hadisənin araşdırılması məqsədilə bütün əlaqədar qurumlarla sıx əməkdaşlıq ediləcəyi vurğulanıb. Kolumbiya Mülki Aviasiya Qurumu təyyarədəki dəliklərlə bağlı hesabatlardan xəbərdar olduqlarını, lakin hələlik aviaşirkət və ya ABŞ rəsmiləri tərəfindən onlarla rəsmi əlaqə saxlanılmadığını bəyan edib.
Qurumdan bildirilib ki, faktların aydınlaşdırılması və problemin qaynağının müəyyən edilməsi üçün hər növ rəsmi ünsiyyətə açıqdırlar. Hazırda hadisənin təyyarə yerdə olarkən, yoxsa uçuş zamanı baş verdiyinə dair araşdırmalar davam edir.
