İranın xarici işlər naziri Abbas Əraqçi sabah ABŞ ilə danışıqlarda iştirak etmək üçün nümayəndə heyəti ilə birlikdə İsveçrənin Cenevrə şəhərinə səfər edib.İran dövlət televiziyasının məlumatına görə, xarici işlər naziri Əraqçi və onun nümayəndə heyəti bir müddət əvvəl İran-ABŞ nüvə danışıqlarının üçüncü raundunda iştirak etmək üçün Tehrandan Cenevrəyə yola düşüb.
İranın rəsmi xəbər agentliyi IRNA-nın məlumatına görə, Mazandaran əyalətində keçirilən tədbirdə çıxış edən Prezident Məsud Pezeşkian ABŞ ilə sabah İsveçrənin Cenevrə şəhərində davam edəcək nüvə danışıqlarına münasibət bildirib.

Pezeşkian bildirib ki, "Bu proses sabah Cenevrədə Xarici İşlər Nazirinin (Abbas Əraqçi) iştirakı ilə davam edəcək. Hökumət olaraq, Ali Liderin (Xamneyi) rəhbərliyi və göstərişlərinə uyğun olaraq, danışıqlar prosesini istiqamətləndirməyə və onu "nə müharibə, nə də sülh" kimi zərərli vəziyyəti aradan qaldıracaq şəkildə idarə etməyə çalışmışıq."

Danışıqların yaxşı bir gələcək vəd etdiyini deyən Pezeşkian əlavə edib: "Əgər danışıqlar prosesi istənilən nəticəni verərsə, şübhəsiz ki, qarşıdakı maneələri aradan qaldırmaq və ölkənin inkişaf prosesini daha tez və asanlıqla irəlilətmək mümkün olacaq."

Pezeşkian həmçinin qonşu ölkələrlə münasibətlərin əhəmiyyətli dərəcədə yaxşılaşdığını və onları daha da gücləndirmək əzmində olduqlarını əlavə edib.


aia.az
Tərcümə şöbəsi

• Danışıqlar
• Cenevrə
• Diplomat
• İran