Vaşinqton Karakası yeni tərəfdaş adlandırır və hasilatın gündəlik 600 min bareldən çox artdığını bildirir...
Poliqon xəbər verir ki, ABŞ Prezidenti Donald Tramp Konqresə müraciəti zamanı ölkəsinin Venesueladan yaxın vaxtlarda 80 milyon bareldən artıq neft aldığını açıqlayıb. O, Karakası Amerikanın “yeni dostu və tərəfdaşı” adlandıraraq iki ölkə arasında enerji sahəsində əməkdaşlığın genişləndiyini bildirib.
ABŞ Prezidenti çıxışında qeyd edib ki, ölkə daxilində də neft və qaz hasilatı sürətlə artırılır. Onun sözlərinə görə, gündəlik hasilat həcmi 600 min bareldən çox yüksəlib və bu, enerji müstəqilliyinin möhkəmləndirilməsi baxımından mühüm göstəricidir. Tramp vurğulayıb ki, ABŞ enerji sektorunda böyük uğurlar əldə edir və dünya bazarlarında mövqelərini gücləndirir.
Xatırladaq ki, 2025-ci ilin dekabrında ABŞ Venesuelaya qarşı neft blokadası tətbiq edib. Rəsmi Karakas həmin dövrdə sanksiyalardan yan keçməklə neft ixrac etməyə cəhd göstərən gəmilərin saxlanıldığını dəfələrlə bəyan edib. 2026-cı il yanvarın 3-də isə ABŞ hərbçiləri Venesuela prezidenti Nikolas Maduronu ələ keçirərək ölkədən çıxarıblar. Bundan sonra Tramp yeni hakimiyyətlə razılaşma əldə edib və Venesuelanın ABŞ-yə 30–50 milyon barel neft təhvil verməsi barədə anlaşma əldə olunub.
Sonrakı mərhələdə ABŞ hökuməti Venesuela neftinin dünya bazarlarında satışına başlayıb. ABŞ Energetika Nazirliyinin açıqlamasına görə, əldə olunan gəlirlər Vaşinqtonun qərarına uyğun şəkildə Amerika və Venesuela xalqlarının maraqları naminə bölüşdürüləcək.
Analitiklər hesab edirlər ki, bu addım həm ABŞ-nin enerji strategiyasının tərkib hissəsidir, həm də Latın Amerikasında siyasi təsir imkanlarının genişləndirilməsinə yönəlib.
Poliqon.info
