Ukraynanın 2022-ci ilin fevral ayında başlayan tammiqyaslı müharibənin nəticələrindən qurtulmaq üçün 10 il ərzində 587,7 milyard dollara (təxminən 500 milyard avro) ehtiyacı olacaq.
Herbiand.az xəbər verir ki, Ukrayna hökuməti, Dünya Bankı (DB), Avropa Komissiyası və Birləşmiş Millətlər Təşkilatı (BMT) 31 dekabr 2025-ci il tarixinə olan qiymətləndirməni təqdim edib.
Baş nazir Yuliya Svyrydenkonun sözlərinə görə, bu məbləğ Ukraynanın 2025-ci il üçün proqnozlaşdırılan nominal ÜDM-dən təxminən üç dəfə çoxdur. Hesabata görə, ən böyük xərc - 96 milyard dollardan çox - nəqliyyat sektorunun yenidən qurulmasına, ardınca mənzil tikintisinə (90 milyard) ehtiyac duyulur. Sonra ticarət və sənaye (63 milyard) və kənd təsərrüfatına (55 milyard) ehtiyac var. Təxminən 28 milyard dollar təmizləmə və mina təmizləməyə xərclənməlidir.
Tammiqyaslı müharibədən Ukraynaya dəyən birbaşa ziyan 195 milyard dolları keçib ki, bu da 2025-ci ilin fevral ayında dərc edilən təxmindən 19 milyard dollar çoxdur. Ən çox zərər çəkənlər cəbhə bölgələri və böyük şəhərlərdir.
