“The Wall Street Journal” qəzetinin mənbələrə istinadən yazdığına görə, ABŞ Suriyadakı əməliyyatı yekunlaşdırır və ölkə ərazisindən 1 min hərbçini çıxarır.
Qəzetin həmsöhbətlərinin sözlərinə görə, ABŞ hakimiyyəti artıq Suriyada hərbi mövcudluğu zəruri hesab etmir. Onlar bildiriblər ki, regionda hökumət qoşunları ilə toqquşma riski azalıb. Bundan əlavə, Suriya hakimiyyəti antiterror əməliyyatlarının aparılması məsuliyyətini öz üzərinə götürüb.
2026-cı ilin yanvarında Suriyanın keçid dövrü prezidenti Əhməd əş-Şaraa hökumət ilə əsasən kürdlərdən ibarət olan Suriya Demokratik Qüvvələri arasında atəşkəs və inteqrasiya sazişini imzalayıb. Fevral ayında isə Suriya ordusu daha əvvəl ABŞ kontingentinin yerləşdiyi bir neçə hərbi bazanı nəzarətə götürüb. 2025-ci ilin yayında Suriya üzrə xüsusi nümayəndə Tomas Barrak ABŞ-nin Suriyadakı səkkiz hərbi bazadan birini saxlamaq niyyətində olduğunu bildirmişdi.
ABŞ və müttəfiqləri Suriyada İŞİD-ə (“İslam Dövləti” terror təşkilatı) qarşı əməliyyata 2014-cü ilin sentyabrında başlayıblar. 2025-ci ilin aprelində — Suriyada hakimiyyət dəyişikliyindən bir neçə ay sonra — ABŞ-nin ölkədəki qoşun sayını 2 mindən 1,4 minə endirdiyi məlum olmuşdu.
